Retiradong Hukom ng Court of Appeals, Kinasuhan Dahil sa Ugnayan sa Pagpaslang sa Abogadong Cebuano

Pormal nang sinampahan ng kasong administratibo ng Korte Suprema ang isang retiradong hukom ng Court of Appeals kaugnay ng umano’y pagkakasangkot nito sa pagpaslang sa isang abogado sa Cebu noong taong 2020.

Ayon kay Supreme Court spokesperson Atty. Camille Ting, si retiradong Associate Justice Isaias Dicdican ay nahaharap sa kasong gross misconduct, batay sa memorandum ni Court Administrator Raul Villanueva na may petsang Marso 24, 2025.

“Ang reklamo laban kay Dicdican ay may kaugnayan sa pagpatay kay Atty. Joey Luis Wee,” pahayag ni Ting sa isang press briefing ngayong Miyerkules.

Kasama si Dicdican sa mga isinampang kaso ng National Bureau of Investigation (NBI) na isinumite sa Cebu City Prosecution Office at/o sa Office of the Prosecutor General.

Si Atty. Wee ay binaril at napatay noong Nobyembre 23, 2020 sa unang palapag ng gusali kung saan matatagpuan ang law office ni Dicdican sa Cebu City.

Ayon sa Korte Suprema, inatasan si Dicdican na magsumite ng kanyang sagot sa loob ng hindi na mapapahabang 10 araw mula sa pagtanggap ng notice.

Laging nakatutok sa Pwersa Balita para sa mga balita na dapat mong malaman! Kami ang Pwersa Balita!
Bisitahin rin aming mga social media accounts:
Facebook | YouTube | X | TikTok | Instagram | Threads