By Arvie Jane Dacara 
Inaasahang tatalakayin ni Pangulong Ferdinand R. Marcos Jr. ang mga pinakabagong kaganapan sa South China Sea (SCS) sa darating na 44th at 45th Association of Southeast Asian Nations (ASEAN) Summits at Related Summits sa Vientiane, Laos, ayon sa Department of Foreign Affairs (DFA) nitong Biyernes.
“Syempre, tiyak na tatalakayin ng Pangulo ang isyung ito, tulad ng kanyang ginagawa sa mga nakaraang summit,” ani Daniel Espiritu, Assistant Secretary ng DFA Office of ASEAN Affairs, sa isang press briefing sa Palasyo nang tanungin kung tatalakayin ni Marcos ang SCS sa ASEAN Summits.
Gaganapin ang ASEAN Summits sa Oktubre 8-11 sa Laos, kung saan inaasahang magpapalitan ng pananaw ang mga lider ng Timog-Silangang Asya sa mahahalagang usaping rehiyonal at pandaigdigan. Sinabi ni Espiritu na bibigyang-diin ni Marcos ang kanyang paninindigan sa pagpapatupad ng United Nations Convention on the Law of the Sea (UNCLOS) at ang 2016 Permanent Court of Arbitration (PCA) ruling ukol sa SCS, upang ipagtanggol ang teritoryo ng Pilipinas laban sa dayuhang kapangyarihan.
“Patuloy na ipagtatanggol ng Pangulo ang soberanya at karapatan ng Pilipinas ayon sa pandaigdigang batas, kabilang ang 1982 UNCLOS at ang 2016 arbitral award,” dagdag pa ni Espiritu.
Ayon sa DFA, umaasa ang Pilipinas na maisasara na ang mga negosasyon para sa isang binding Code of Conduct (COC) sa SCS, kung saan matagal na itong pinag-uusapan ng mga ASEAN member-states sa loob ng dalawang dekada.
Bagamat hindi direktang sinabi kung magkakaroon ng iisang paninindigan ang ASEAN laban sa patuloy na agresyon ng Tsina sa SCS, iginiit ni Espiritu na magsusumikap ang rehiyonal na bloc sa diplomatikong paraan ng pagresolba ng mga alitan sa teritoryo.
Bukod sa pagtalakay ng SCS, magkakaroon din si Marcos ng mga bilateral at business meetings. Naka-schedule na ang mga pulong ng Pangulo sa mga pinuno ng Canada, New Zealand, Vietnam, at Japan. Makikipagpulong din siya sa mga negosyante at mga lider ng industriya tulad ng TikTok Southeast Asia, Shera Public Co. ng Thailand, at Capital A. Isasagawa rin ang ASEAN Business and Investment Summit upang hikayatin ang kooperasyon at pamumuhunan sa rehiyon.
Samantala, magpupulong si Marcos kasama ang Filipino community sa Laos sa bisperas ng ASEAN summits sa Wanda Hotel, Vientiane, kung saan tinatayang nasa 400 Pilipino ang dadalo.
Laging nakatutok sa Pwersa Balita para sa mga balita na dapat mong malaman! Kami ang Pwersa Balita! Bisitahin rin ang aming mga social media accounts:
Kenneth Marcos