By Arvie Jane Dacara 
Nakatakdang idaos sa Pilipinas ang East Asia and the Pacific International Public Procurement Conference mula Abril 28 hanggang 30, na lalahukan ng mahigit 150 procurement experts at opisyal mula sa 15 bansa sa rehiyon upang talakayin ang mahahalagang isyu at reporma sa paggasta ng gobyerno at transparency.
Ayon sa Department of Budget and Management (DBM) nitong Huwebes, mismong si Pangulong Ferdinand R. Marcos Jr. ang mangunguna sa pagbubukas ng nasabing kumperensya na gaganapin sa Lungsod ng Maynila.
Ang pagtitipong ito ay magkatuwang na inorganisa ng DBM, Government Procurement Policy Board – Technical Support Office (GPPB-TSO), at World Bank, bilang bahagi ng layuning palakasin ang ugnayan ng mga bansa sa rehiyon sa larangan ng modernong procurement o pampublikong pag-aangkat.
Magkakaroon ng mga plenary sessions, panel discussions, at case studies na layong itaguyod ang pananagutan, inklusibong pag-unlad, at sustainable na paggasta ng pamahalaan.
“Ang procurement ay isa sa pinakamahalagang aktibidad ng gobyerno na may malaking papel sa maayos at epektibong paghahatid ng serbisyo sa taumbayan,” pahayag ni DBM Secretary at GPPB Chairperson Amenah Pangandaman.
Aniya, layon din ng kumperensya na ipakita ang mga hakbangin ng Pilipinas sa ilalim ng New Government Procurement Act (NGPA), at ipatampok ang bansa bilang lider sa rehiyon pagdating sa modernong procurement policy.
“Ito ay itinuturing nating pinakamalaking batas kontra korapsyon sa kasalukuyan, na nagpapalakas sa transparency, accountability, at tamang paggamit ng pondo ng bayan,” dagdag ni Pangandaman.
Sa temang “Procurement for the People: Bridging Innovation, Value for Money, and Accountability,” tatalakayin din sa tatlong araw na aktibidad kung paanong ang mga makabagong pamamaraan sa procurement ay makakatulong sa pagpapalakas ng mga komunidad, pamumuhunang panghenerasyon, at tugon sa krisis sa klima.
Kabilang sa mga paksa ay ang pagpapataas ng propesyonalisasyon sa procurement system at pagpapaigting ng partisipasyon ng mamamayan sa pamahalaan.
Laging nakatutok sa Pwersa Balita para sa mga balita na dapat mong malaman! Kami ang Pwersa Balita!
Bisitahin rin aming mga social media accounts:
Facebook | YouTube | X | TikTok | Instagram | Threads
Kenneth Marcos