By Arvie Jane Dacara 
Pormal nang sinimulan nitong Lunes, Mayo 19, ang isang buwang military exercise na tinaguriang “Exercise Kasangga 2025-1” sa pagitan ng Philippine Army at Australian Army, na unang beses isinagawa sa rehiyon ng Mindanao.
Ayon kay Col. Louie Dema-ala, tagapagsalita ng Philippine Army (PA), ginanap ang pagbubukas ng ehersisyo sa Camp Edilberto Evangelista sa Patag, Cagayan de Oro. Layunin ng pagsasanay na palakasin ang ugnayan ng dalawang hukbo at linangin ang kakayahan ng mga sundalong kalahok sa mga totoong senaryo ng labanan.
“Ang Philippine Army-Australian Army Exercise (PAAAE) ‘Kasangga’ 2025-1 ay pinangungunahan ng tatlong platoon mula sa ika-4 at ika-10 Infantry Division ng PA at Combat Engineer Regiment, kasama ang kanilang Australian counterparts,” pahayag ni Dema-ala.
Isasagawa ang pagsasanay mula Mayo 19 hanggang Hunyo 24 sa Camp Kibaritan sa Bukidnon. Ang Exercise Kasangga ay tumutukoy sa salitang Filipino na nangangahulugang “kaalyado” o “katuwang.”
Kabilang sa mga aktibidad sa ilalim ng ehersisyo ang jungle at urban operations, breaching operations, tactical casualty care, jungle survival, mobility at counter-mobility strategies, at reconnaissance missions. Layunin nitong palalimin ang pag-unawa ng dalawang militar sa kani-kanilang mga taktika at estratehiya.
Ayon pa kay Dema-ala, may tiwala ang pamunuan ng Philippine Army na magpapalakas ito sa kakayahang makipagsabayan ng mga yunit at indibidwal na sundalo sa mga warfighting function.
“Buo ang aming suporta sa pagbuo ng matitibay na alyansa sa mga bansang katuwang tulad ng Australia, para isulong ang kapayapaan at seguridad sa rehiyon,” ani PA Commanding General Lt. Gen. Roy Galido.
Noong nakaraang taon, dalawang Kasangga Exercises din ang isinagawa sa Northern Luzon at Bicol Region, na pinangunahan naman ng ika-9 at ika-5 Infantry Division ng Philippine Army.
Laging nakatutok sa Pwersa Balita para sa mga balita na dapat mong malaman — kami ang Pwersa Balita!
Bisitahin rin aming mga social media accounts:
🌐 Facebook
📺 YouTube
🐦 X (Twitter)
🎵 TikTok
📸 Instagram
🧵 Threads
Kenneth Marcos