By Arvie Jane Dacara 
Nagbabala ang Commission on Population and Development (CPD) sa tumataas na bilang ng adolescent pregnancies sa Pilipinas, partikular sa mga kabataang wala pang 15 taong gulang.
Sa isang pahayag nitong Miyerkules, sinabi ni CPD Undersecretary Lisa Grace Bersales na ang nakababahalang trend na ito ay nangangailangan ng agarang aksyon. Binanggit niya ang kahalagahan ng malawakang sexuality education na angkop sa edad ng kabataan upang matugunan ang isyung ito.
“Ang aming pokus ay protektahan ang kabataan mula sa pang-aabuso at bigyan sila ng mga kasanayan sa buhay upang makagawa ng tamang desisyon,” ani Bersales.
Ayon sa datos mula sa Philippine Statistics Authority (PSA), tumaas ang bilang ng mga live births mula sa mga batang edad 10 hanggang 14, mula 2,411 noong 2019 patungong 3,343 noong 2023, katumbas ng 6.6% na pagtaas.
Mas nakababahala pa, iniulat na 38 batang babae na wala pang 15 taong gulang ang nakaranas ng multiple pregnancies noong 2023, habang 17 kababaihan na wala pang 20 ang edad ang nanganak na ng lima o higit pang beses.
Ang problemang ito ay higit na tumitindi sa mga rehiyong may mataas na populasyon tulad ng Metro Manila, Central Luzon, at CALABARZON (Cavite, Laguna, Batangas, Rizal, at Quezon).
Hinikayat ni Bersales ang agarang aksyon mula sa Senado upang maipasa ang Adolescent Pregnancy Prevention Bill (Senate Bill 1979), na kasalukuyang nasa ilalim ng interpellation.
“Mahalaga ang isyung ito dahil direktang naaapektuhan nito ang kalusugan at kinabukasan ng ating mga kabataan, na siyang magiging bahagi ng workforce ng bansa. Ang pagtugon dito ay mahalaga upang makamit ang mga benepisyo ng demographic dividend at mapanatili ang paglago ng ekonomiya,” diin ni Bersales.
Laging nakatutok sa Pwersa Balita para sa mga balita na dapat mong malaman. Kami ang Pwersa Balita!
Bisitahin rin ang aming mga social media accounts:
Kenneth Marcos