By Arvie Jane Dacara 
Patuloy na binabantayan ng mga awtoridad sa Negros Oriental ang mga natitirang miyembro ng isang na-disband na private armed group (PAG) na posibleng bumalik sa lalawigan para sa nalalapit na halalan sa Mayo o sa personal na dahilan, ayon sa opisyal noong Miyerkules.
Ayon kay Lt. Stephen Polinar, tagapagsalita ng Negros Oriental Police Provincial Office (NOPPO), anim na miyembro ng naturang grupo ang pinaniniwalaang tumakas patungo sa ibang bahagi ng isla matapos buwagin ang kanilang operasyon ilang taon na ang nakalipas.
Sinabi rin ni Polinar na ang mga indibidwal na ito ay wanted dahil sa umano’y pagkakasangkot sa mga kaso ng pamamaril, kabilang na ang ilang insidenteng may kaugnayan sa halalan. Kasalukuyan din silang iniimbestigahan sa posibleng pagkakaugnay sa pagpaslang kay dating Gobernador Roel Degamo noong Marso 4, 2023, ngunit tumanggi si Polinar na magbigay ng karagdagang detalye.
“Hindi makakalusot ang pagbabalik ng mga suspek sa Negros Oriental,” tiniyak ni Polinar, na nagsabing aktibong minomonitor ng pulisya at ng National Bureau of Investigation (NBI) ang kilos ng mga suspek.
Sa kabila nito, wala pang natatanggap na ulat ang mga awtoridad ukol sa presensya ng mga armadong tao o mga guns-for-hire sa Negros Oriental kaugnay ng mid-term elections.
Bilang dagdag na seguridad, mahigpit na binabantayan ng mga law enforcement authorities ang mga entry at exit points tulad ng mga paliparan, pantalan, at mga hangganan ng lalawigan upang masiguro na walang masasamang elemento ang makakapasok sa Negros Oriental, ayon kay Polinar.
Laging nakatutok sa Pwersa Balita para sa mga balita na dapat mong malaman. Kami ang Pwersa Balita!
Bisitahin rin ang aming mga social media accounts:
Kenneth Marcos