By Arvie Jane Dacara 
Iginiit ng House of Representatives Quad Committee (Quadcom) nitong Biyernes na legal ang kanilang kautusan na ilipat si Cassandra Li Ong, isang person-of-interest sa isyu ng Philippine Offshore Gaming Operators (POGO), sa Correctional Institute for Women (CIW).
“Gusto naming ipaliwanag nang malinaw: Ang paglilipat kay Ms. Ong sa Correctional Institute for Women ay naaayon sa batas. Sinunod ng Quadcom ang lahat ng kinakailangang proseso, at ang desisyon ay nakabatay sa rule of law,” ayon sa magkasanib na pahayag ng mga co-chairperson ng Quadcom.
Kasama sa mga co-chairperson ng Quadcom sina Surigao del Norte Rep. Ace Barbers, Manila Rep. Bienvenido Abante Jr., Abang Lingkod Rep. Joseph Stephen Paduano, Sta. Rosa Rep. Dan Fernandez, at Antipolo Rep. Romeo Acop.
Ayon sa mga mambabatas, dapat sisihin ni Ong ang kanyang mga abogado na nagsabing mas nais ng kanilang kliyente na makulong sa isang piitan kaysa manatili sa Kongreso.
Pinabulaanan din nila ang mga paratang na may kinalaman sa diumano’y pagpapataw ng pressure ng mga mambabatas sa paglipat ni Ong, na kanilang tinawag na “espekulasyon” at “walang sapat na ebidensya.”
Dagdag pa ng mga lider ng Quadcom, walang basehan ang mga alegasyon ng mga abogado ni Ong at ang mga ginagawang imbestigasyon ng komite ay nakatuon sa paghahanap ng katotohanan at pagsulong ng hustisya, at hindi para manipulahin ang resulta ng mga pagdinig.
“Maingat naming sinusuri ang lahat ng usapin na may kinalaman sa mga pandaigdigang kasunduan. Tinitiyak namin sa publiko na kami ay nananatiling tapat sa paggalang sa mga karapatan ng bawat indibidwal at sinisiguro na lahat ng hakbang ay naaayon sa mga lokal at internasyonal na batas,” sabi pa nila.
Hinikayat nila ang publiko at iba pang mga partidong may kinalaman sa kaso na hayaan ang mga legal na proseso na tumakbo sa kasalukuyang pagdinig habang tinitiyak ang kaligtasan at kalusugan ni Ong.
“Prayoridad ang kalagayan ni Ms. Ong. Tinitiyak ng mga awtoridad na ang kanyang paglilipat ay naisagawa nang ligtas at may paggalang sa kanyang mga karapatan,” dagdag ng Quadcom.
Laging nakatutok sa Pwersa Balita para sa mga balita na dapat mong malaman! Kami ang Pwersa Balita! Bisitahin rin aming mga social media accounts:
Kenneth Marcos