Mayor ng Porac, Pampanga Diskwalipikado—Comelec Kinilala ang Reklamo ng Dating Alkalde

Porac, Pampanga — Idineklara ng Commission on Elections (Comelec) na diskwalipikado si Jaime Capil, ang muling nahalal na alkalde ng bayan ng Porac, Pampanga, dahil sa naunang kautusan ng Office of the Ombudsman na nagpapawalang-bisa sa kanyang serbisyo.

Sa isang walong-pahinang resolusyon na inilabas ng Comelec Second Division nitong Miyerkules, pinaboran ng komisyon ang petisyon na inihain ni dating mayor Michael Tapang noong Abril 15 laban kay Capil.

“Dahil dito, ipinagkakaloob ng Komisyon (Ikalawang Dibisyon) ang petisyong ito at idinedeklara si Jaime Capil na diskwalipikado sa pagtakbo bilang alkalde ng Bayan ng Porac, Probinsya ng Pampanga, para sa halalan noong Mayo 12, 2025,” nakasaad sa desisyon.

Ang diskalipikasyon ni Capil ay bunsod ng kautusan ng Ombudsman na tanggalin siya sa puwesto dahil sa “gross neglect of duty” o matinding kapabayaan kaugnay sa operasyon ng iligal na Philippine Offshore Gaming Operator (POGO) hub na Lucky South 99 sa kanilang bayan.

Tinukoy ng Comelec ang probisyon sa Local Government Code na nagsasabing ang sinumang opisyal na natanggal sa puwesto sa bisa ng kasong administratibo ay awtomatikong hindi na maaaring tumakbo sa anumang lokal na posisyon.

“Ang pagpapahintulot sa isang kandidatong na-disqualify sa administratibong kaso ay isang pagwawalang-bahala sa kapangyarihang ipinataw ng Ombudsman. Isa rin itong pagsira sa integridad ng proseso ng halalan,” pahayag ng komisyon.

Dagdag pa ng Comelec, bilang isang constitutional commission, tungkulin nilang tiyaking tanging mga kwalipikado lamang ang maaaring tumakbo at mahalal sa mga pampublikong posisyon.

Si Capil ay idineklara pa ring nanalo noong Mayo 12 na halalan matapos makakuha ng 39,939 boto, mas mataas kumpara kay Tapang na nakakuha lamang ng 23,063 boto.

Gayunpaman, idineklara ng Comelec na “stray votes” o hindi na bibilangin ang mga boto para kay Capil.

Inatasan din ng komisyon ang muling pagpupulong ng Municipal Board of Canvassers (MBOC) ng Porac upang itama ang Certificate of Canvass of Votes at opisyal na iproklama ang kandidatong may pinakamataas na bilang ng balidong boto.

Laging nakatutok sa Pwersa Balita para sa mga balita na dapat mong malaman — kami ang Pwersa Balita! Bisitahin rin aming mga social media accounts:
🔵 Facebook
🔴 YouTube
🐦 X (Twitter)
🎵 TikTok
📸 Instagram
🧵 Threads