By Arvie Jane Dacara 
Nagbabala ang mga Israeliong siyentipiko na ang mga taong may mataas na antas ng sodium sa dugo—kahit nasa normal na saklaw pa rin—ay may mas mataas na posibilidad na magkaroon ng altapresyon at heart failure o pagkabigo ng puso. Ngunit ayon sa kanila, ang pananatiling well-hydrated o sapat sa tubig ay maaaring makaiwas sa mga ganitong problema sa kalusugan.
Base sa bagong pag-aaral mula sa mga mananaliksik ng Bar-Ilan University sa Israel, sinuri nila ang 20 taong datos mula sa electronic health records ng mahigit 407,000 malulusog na matatanda na miyembro ng Leumit Healthcare Services, isa sa mga pinakamalaking tagapaghatid ng serbisyong medikal sa bansa.
Lumabas sa kanilang pag-aaral, na inilathala sa European Journal of Preventive Cardiology, na ang mga taong may sodium level sa itaas ng karaniwang saklaw—ngunit hindi pa rin lumalampas sa tinuturing na “normal”—ay may mas mataas na panganib ng pagkakaroon ng chronic na sakit sa puso.
Ang kasalukuyang tinatanggap na normal na antas ng sodium sa dugo ay nasa pagitan ng 135–146 mmol/L. Ngunit napag-alamang ang mga taong may antas na nasa pagitan ng 140–146 mmol/L ay may mas mataas na tiyansang magkaroon ng altapresyon at heart failure, kahit pa sila ay itinuturing na malusog.
Partikular na mapanganib ang antas ng sodium na lagpas sa 143 mmol/L, kung saan tumaas ng 29% ang posibilidad ng altapresyon at 20% para sa heart failure.
“Ang resulta ng aming pananaliksik ay nagpapakita na ang hydration o sapat na pag-inom ng tubig ay isang mahalagang aspeto ng pag-iwas sa mga chronic na sakit—na kadalasan ay hindi nabibigyang pansin,” ayon kay Prof. Jonathan Rabinowitz ng Weisfeld School of Social Work sa Bar-Ilan University, pinuno ng pag-aaral.
Ipinaliwanag din niya na ang simpleng pagsusuri sa dugo ay maaaring makatukoy kung sino ang maaaring makinabang sa simpleng pagbabago sa pamumuhay, gaya ng mas madalas na pag-inom ng tubig na nakatutulong sa pagpapababa ng sodium levels sa katawan.
Ayon sa pag-aaral, tumataas ang sodium level kapag kulang sa tubig ang katawan, dahil wala itong sapat na likido para tunawin ang sodium.
Halos 60% ng mga kalahok sa pag-aaral ay may sodium level na nasa saklaw ng panganib, na nagpapakitang karaniwan ang ganitong kondisyon kahit sa mga taong walang iniindang sakit.
Siniguro ng mga mananaliksik ang bisa ng kanilang datos sa pamamagitan ng pag-aalis sa mga kalahok na may kondisyon na maaaring makaapekto sa balanse ng tubig sa katawan. Isinasaalang-alang din sa pagsusuri ang mga salik tulad ng edad, kasarian, timbang, paninigarilyo, antas ng potassium, at blood pressure.
“Lagi nating nalilimutan ang kahalagahan ng sapat na hydration sa pangmatagalang kalusugan. Ngayong malinaw ang ebidensiya, dapat nating isaalang-alang ang mas regular at sapat na pag-inom ng tubig,” dagdag pa ni Rabinowitz.
Ayon sa US National Academies of Sciences, Engineering, and Medicine, ang inirerekomendang dami ng likidong iniinom kada araw ay nasa 3.7 litro para sa mga lalaki at 2.7 litro para sa mga babae. Gayunman, maaaring mag-iba ang pangangailangan depende sa edad, antas ng aktibidad, klima, at kalusugan ng isang tao.
Laging nakatutok sa Pwersa Balita para sa mga balita na dapat mong malaman kami ang Pwersa Balita! Bisitahin rin aming mga social media accounts
🔗 https://www.facebook.com/PwersaBalita/
🔗 www.youtube.com/@pwersabalita
🔗 https://x.com/PwersaBalita
🔗 https://www.tiktok.com/@pwersabalita
🔗 https://www.instagram.com/pwersabalita/
🔗 https://www.threads.net/@pwersabalita
Kenneth Marcos