By Arvie Jane Dacara 
Pinuri ni Pangulong Ferdinand R. Marcos Jr. ang Anti-Terrorism Council (ATC) sa kanilang tagumpay sa paglaban sa banta ng terorismo at pagpapatatag ng seguridad ng bansa ngayong taon.
Sa ika-33 pagpupulong at yearend celebration ng ATC sa Malacañang nitong Miyerkules, tiniyak ng Pangulo ang buong suporta ng kanyang administrasyon sa misyon ng konseho.
“Sa pamamagitan ng pagbuwag sa mga grupong terorista at pagputol ng kanilang mapagkukunan ng pondo, malinaw naming ipinapakita na ang kaligtasan ng ating mga mamamayan ang aming pangunahing prayoridad,” ani Marcos.
Dagdag pa niya, magpapatuloy ang pamahalaan sa pamumuhunan sa mga inisyatibang naghahalo ng matibay na aksyon at inklusibong diskarte upang makamit ang pangmatagalang kapayapaan.
Bukod sa paglansag sa mga banta, layunin din ng ATC na pigilan ang pag-usbong ng terorismo sa pamamagitan ng mga programang kontra sa marahas na ekstremismo at pagpapalakas ng tiwala sa mga komunidad.
Ipinagmalaki rin ng Pangulo ang mga tagumpay ng administrasyon sa larangan ng anti-terrorism program. Kabilang dito ang matagumpay na pag-freeze ng mga asset na konektado sa terorismo at mga matagumpay na kaso laban sa mga sangkot dito, na nagpapakita ng determinasyon ng bansa laban sa pandaigdigang banta.
Ipinunto rin ni Marcos ang progreso ng bansa sa paglabas sa Financial Action Task Force (FATF) Grey List, na may malaking benepisyo tulad ng mas maayos na remittance para sa overseas workers at mas mataas na kumpiyansa ng mga mamumuhunan—isang hakbang na nagpapalakas sa ekonomiya ng Pilipinas.
“Ang mga tagumpay na ito ay nagawa sa pamamagitan ng pagkakaisa ng iba’t ibang ahensya, sektor ng pribado, at walang kapagurang lingkod-bayan. Pinapaalala nito sa atin na kapag tayo ay kumilos bilang isa, kaya nating makamit ang mga layuning umaabot sa buong mundo at sa mga susunod na henerasyon,” ani Marcos.
“Ang ating laban ay nangangailangan ng patuloy na ebolusyon. Ang terorismo, na sinusuportahan ng teknolohiyang patuloy na umuunlad at mga taktikang pabago-bago, ay humihingi ng tugon na pinagsasama ang lakas at malasakit, pagbabantay at pakikiramay, pati na ang estratehiya at mahabang pananaw,” dagdag pa niya.
Laging nakatutok sa Pwersa Balita para sa mga balita na dapat mong malaman! Kami ang Pwersa Balita! Bisitahin rin ang aming mga social media accounts:
Kenneth Marcos