By Arvie Jane Dacara 
Sa nagpapatuloy na kampanya laban sa ilegal na droga, mahigit PHP9 milyon halaga ng droga ang nakumpiska ng Police Regional Office-Davao (PRO-11) sa 308 operasyon noong Nobyembre.
Ayon kay PRO-11 Director Brig. Gen. Leon Victor Rosete, 367 katao ang naaresto sa isinagawang mga operasyon. Kabilang dito ang pagkakakumpiska sa 1.33 kilo ng shabu na nagkakahalaga ng PHP9.07 milyon at 37 gramo ng marijuana na may halagang PHP112,641.20.
Dagdag pa ni Rosete, sa mga naarestong indibidwal, 48 ang itinuturing na high-value targets, kabilang ang ilang nasa top 10 ng rehiyon, at 319 naman ang street-level personalities.
Aniya, ang tagumpay na ito ay resulta ng pinaigting na anti-drug roadmap ng PRO-11 na balanse ang pagpapatupad ng batas at ang paggalang sa karapatang pantao.
“Nananatiling matatag ang aming misyon na makapagtaguyod ng mga komunidad na ligtas mula sa ilegal na droga. Hinihikayat namin ang publiko na makipagtulungan at mag-ulat ng anumang impormasyon kaugnay sa ilegal na aktibidad na ito,” pahayag ni Rosete.
Laging nakatutok sa Pwersa Balita para sa mga balita na dapat mong malaman! Kami ang Pwersa Balita! Bisitahin rin ang aming mga social media accounts:
Kenneth Marcos