By Arvie Jane Dacara 
Magsisimula na ngayong Abril 8 ang 2024 Junior Philippine Golf Tour (JPGT) sa Eagle Ridge Golf and Country Club sa General Trias, Cavite, kung saan nakataya ang mga puntos para sa World Amateur Golf Ranking.
Ang 15-leg tournament ay hinati sa tatlong age divisions: 7-10, 11-14, at 15-18, na layuning mahasa ang mga kabataang Pinoy sa kompetisyong may mataas na antas.
Sa boys’ 15-18 division, tampok sina Shinichi Suzuki at Charles Serdenia, na parehong sasabak din sa prestihiyosong torneo sa San Diego ngayong Hulyo. Kasama rin sa laban ang mga kilalang junior golfers na sina Alonso Espartero, Alonso Corpus, John Paul Agustin, Jr., at Kristoffer Nadales.
Sa girls’ 15-18 category naman, aasahan ang galing nina Precious Zaragosa, Tiffany Bernardino, Rafa Anciano, at Jada Santiago.
Sa 11-14 division ng mga babae, magpapasiklaban ang magkapatid na Lisa at Mona Sarines laban kina Arielle Espartero at Eliana Dumalaog, habang sa panig ng mga lalaki ay nangunguna sina Vito Sarines at Race Manhit.
Sa pinakabatang kategorya (7-10), inaasahang mangunguna sina Venus delos Santos at Mavis Espedido sa girls’ division, at sina Jesus Yambao at Zoji Edoc sa boys’ division.
Upang tiyakin ang patas na representasyon sa buong bansa, hinati ang JPGT sa North at VisMin series, kung saan pinapayagan lamang ang mga kalahok na sumali sa rehiyong konektado sa kanilang tirahan o lugar ng kapanganakan.
Ang North Series ay magpapatuloy sa Sherwood Hills mula Abril 22–24 at sa Splendido Taal mula Abril 28–30.
Samantala, aarangkada ang VisMin leg sa Cebu mula Mayo 5–7, at susundan ng mga torneo sa Negros Occidental at Bacolod sa kalagitnaan ng Mayo.
Inilunsad ang JPGT ng ICTSI noong 2023 at isinasagawa sa pamamahala ng Pilipinas Golf Tournaments, Inc.. Magtatapos ang tour sa North vs South Elite Finals mula Setyembre 30 hanggang Oktubre 2 sa The Country Club.
Laging nakatutok sa Pwersa Balita para sa mga balita na dapat mong malaman! Kami ang Pwersa Balita!
Bisitahin rin aming mga social media accounts:
Facebook | YouTube | X | TikTok | Instagram | Threads
Kenneth Marcos