By Arvie Jane Dacara 
Magsisimula na ngayong Martes, Abril 9, ang matinding best-of-three Finals series ng Premier Volleyball League (PVL) All-Filipino Conference sa Smart Araneta Coliseum, kung saan muling susubukan ng Creamline Cool Smashers na ipagpatuloy ang kanilang paghahari habang target ng Petro Gazz Angels na magsulat ng bagong kasaysayan sa liga.
Itinakda ang Game 1 sa ganap na 6:30 ng gabi.
Banderado ng mga kilalang manlalaro gaya nina Bernadeth Pons, Tots Carlos, Alyssa Valdez, Jema Galanza, Bea de Leon, Pangs Panaga, at Kyle Negrito, determinado ang Creamline na makamit muli ang kampeonato.
Matapos matalo sa Petro Gazz sa semifinals (23-25, 22-25, 25-21, 16-25), bumangon ang Cool Smashers at pinatumba ang Akari (25-18, 25-19, 25-19) at Choco Mucho (25-19, 25-15, 25-15) upang makapasok sa championship round.
“Hindi kami basta-basta susuko. Ginagawa lang namin ang trabaho namin — ang ipaglaban ang korona,” ayon kay Coach Sherwin Meneses ng Creamline.
Samantala, buo ang kumpiyansa ng Petro Gazz Angels matapos ang impresibong panalo kontra Creamline. Sunod-sunod din nilang dinaig ang Akari (25-22, 25-20, 25-18) at Choco Mucho (24-26, 25-18, 25-17, 27-25) para masungkit ang Finals slot.
Hangad din ng Angels na makabawi matapos talunin ng Creamline noong 2023 sa championship match. Pangungunahan sila nina Brooke Van Sickle, Myla Pablo, MJ Phillips, at Jonah Sabete.
Ito raw ang “pinakamahirap na Finals” ayon kay Alyssa Valdez, pero buo raw ang laban ng Creamline. “Kompleto, malakas, at gutom sa panalo ang Petro Gazz, pero ibibigay namin ang lahat para mapanatili ang korona,” dagdag pa niya.
“Syempre, kami ang Creamline – hindi kami bibigay ng basta-basta. Ang layunin namin ay isang bagay lang: depensahan ang korona,” sabi rin ni Coach Meneses.
Sa kasalukuyan, hawak ng Creamline ang 10 titulo sa 13 Finals appearances, kabilang na ang apat na sunod na kampeonato sa PVL.
Samantala, magtatapatan din ang Choco Mucho at Akari para sa third place sa isa ring best-of-three series na magsisimula sa 4:00 ng hapon.
Laging nakatutok sa Pwersa Balita para sa mga balita na dapat mong malaman! Kami ang Pwersa Balita!
Bisitahin rin aming mga social media accounts:
Facebook | YouTube | X | TikTok | Instagram | Threads
Kenneth Marcos