By Arvie Jane Dacara 
Kumpirmado na pinagkalooban ni Pangulong Ferdinand R. Marcos Jr. ng executive clemency ang dating alkalde ng Iloilo City na si Jed Patrick Mabilog, ayon sa Malacañang.
Kinumpirma ng kampo ni Mabilog ngayong Lunes ng umaga ang desisyon ni Pangulong Marcos. Sa isang text message sa mga mamamahayag, kinumpirma rin ito ni Executive Secretary Lucas Bersamin.
Sa hiwalay na pahayag, sinabi ni Bersamin na ang mga parusa at mga limitasyon kaugnay ng administratibong kaso ni Mabilog ay tinanggal na.
“Sa pagtanaw sa matagal nang paninindigan ni dating Iloilo City Mayor Jed Patrick Mabilog para sa mabuting pamamahala, kasama na ang mga parangal at pagkilalang natanggap ng Iloilo City sa ilalim ng kanyang liderato, pinagbigyan ng Pangulo ang kanyang petisyon para sa executive clemency. Dahil dito, tinanggal ang mga parusa o limitasyong dulot ng kanyang administratibong kaso,” ani Bersamin.
Matatandaang noong 2017, pinatawan si Mabilog ng dismissal mula sa serbisyo dahil sa kasong misconduct at dishonesty. Idinagdag din ang kanyang pangalan sa kontrobersyal na “narcolist” ni dating Pangulong Rodrigo Duterte, na mariin niyang itinanggi.
Gayunpaman, walang kasong kriminal ang isinampa laban kay Mabilog kaugnay ng iligal na droga. Dahil sa pangamba para sa kanyang buhay, siya ay kusang-loob na nagpunta sa ibang bansa at nanatili roon ng pitong taon.
Noong Setyembre 19, 2024, nagpakita si Mabilog sa isang congressional hearing upang linisin ang kanyang pangalan sa mga akusasyon ng koneksyon sa droga.
Sa kabila nito, humaharap pa rin si Mabilog sa kasong graft sa Office of the Ombudsman dahil sa umano’y panghihimasok sa pagbibigay ng kontrata ng gobyerno sa isang towing services firm kung saan sinasabing may personal na interes siya at isang dating konsehal ng lungsod.
Laging nakatutok sa Pwersa Balita para sa mga balita na dapat mong malaman. Kami ang Pwersa Balita! Bisitahin rin ang aming mga social media accounts:
Kenneth Marcos