By Arvie Jane Dacara 
Ang tropical cyclone na si Bagyong Bebinca ay nananatiling nasa labas ng Philippine Area of Responsibility (PAR), ayon sa ulat ng Philippine Atmospheric, Geophysical and Astronomical Services Administration (PAGASA) ngayong Huwebes.
Huling namataan si Bebinca sa layong 1,975 kilometro silangan ng Gitnang Luzon at inaasahang papasok sa PAR sa darating na Biyernes. Kapag pumasok na ito sa loob ng PAR, tatawagin itong “Ferdie.”
Ayon sa PAGASA, magdadala ang trough ng Bebinca ng kalat-kalat na pag-ulan at mga pagkulog at pagkidlat sa mga lugar ng Eastern Visayas, Caraga, Catanduanes, Albay, Sorsogon, at Masbate. Maaari rin itong magdulot ng mga pag-ulan o pagkidlat sa Cagayan Valley, Aurora, Quezon, at natitirang bahagi ng Bicol Region.
Samantala, ang habagat o southwest monsoon ay magdadala ng kalat-kalat na pag-ulan at pagkulog sa Palawan, Occidental Mindoro, Romblon, at nalalabing bahagi ng Visayas at Mindanao. Pinayuhan din ang mga residente na mag-ingat dahil ang katamtaman hanggang malakas na ulan ay posibleng magdulot ng mga flash floods o landslides.
Sa ibang bahagi ng Mimaropa at Calabarzon, ang habagat ay magdudulot ng mga isolated rain showers o pagkidlat, na mararanasan din sa Metro Manila at ibang bahagi ng Luzon dahil sa localized thunderstorms.
Sa silangang bahagi ng Mindanao, inaasahan ang katamtaman hanggang malalakas na hangin at katamtaman hanggang maalon na karagatan. Sa ibang lugar naman, magiging banayad hanggang katamtaman ang hangin, na may banayad hanggang katamtamang pag-alon.
Laging nakatutok sa Pwersa Balita para sa mga balita na dapat mong malaman! Kami ang Pwersa Balita! Bisitahin rin ang aming mga social media accounts:
Facebook: https://www.facebook.com/PwersaBalita
YouTube: www.youtube.com/@pwersabalita
X (Twitter): https://x.com/PwersaBalita
TikTok: https://www.tiktok.com/@pwersabalita
Instagram: https://www.instagram.com/pwersabalita
Threads: https://www.threads.net/@pwersabalita
Kenneth Marcos