By Arvie Jane Dacara 
Target ng pamahalaang lungsod ng Cebu na makipagkasundo sa Department of Environment and Natural Resources (DENR) para sa isang land-swap deal upang mabawi ang mga lupang dating ibinigay para sa lokal na pabahay na proyekto.
Ayon kay Acting Mayor Raymond Alvin Garcia, ang inisyatiba ng pabahay ay tugon sa direktiba ni Pangulong Ferdinand R. Marcos Jr. sa ilalim ng programang “Pambansang Pabahay Para sa Pilipino” (4PH), na layuning matugunan ang kakulangan sa pabahay sa bansa sa pamamagitan ng pagtatayo ng isang milyong yunit kada taon hanggang 2028.
Inaasahan ni Garcia na ihaharap ng Cebu City Planning Office ang development plan para sa iminungkahing Budlaan Valley Resettlement Area at Camp Marina Resettlement sa Task Force Pabahay sa mga darating na araw. Ayon kay Garcia, hinihintay ng task force ang legal na opinyon mula sa City Legal Office tungkol sa land-swapping plan sa pagitan ng DENR-Central Visayas at ang pagbawi ng lupa mula sa Evangelical Free Church, matapos mabigong sundin ng simbahan ang mga kondisyon sa kasunduan ng donasyon.
Sa ilalim ng panukala ng lungsod, ililipat ang Regional Wildlife Sanctuary Center ng DENR-7 mula sa Camp Marina sa Barangay Kalunasan patungo sa Barangay Guba, upang magamit ang lupa para sa pabahay ng pamahalaan.
Sinabi naman ni Atty. Ronald Anthony Librando, executive director ng Cebu City Division for the Welfare of the Urban Poor, na nagsimula na ang negosasyon sa mga maaapektuhan ng Budlaan Valley Resettlement Area at hinihintay na lang ang development plan.
Ang mga lupang donasyon ng lungsod ay may sukat na 1.1 ektarya na kasalukuyang inuukupa ng DENR at 4.3 ektarya naman ng Evangelical Free Church. “Hinihintay na lang namin ang rekomendasyon ng City Legal kung mayroong anumang legal na hadlang sa aming mungkahing pagbawi ng lupa mula sa Evangelical Free Church,” ani Librando.
Laging nakatutok sa Pwersa Balita para sa mga balita na dapat mong malaman! Kami ang Pwersa Balita! Bisitahin rin ang aming mga social media accounts:
- https://www.facebook.com/PwersaBalita/
- www.youtube.com/@pwersabalita
- https://x.com/PwersaBalita
- https://www.tiktok.com/@pwersabalita
- https://www.instagram.com/pwersabalita/
- https://www.threads.net/@pwersabalita
Kenneth Marcos