By Arvie Jane Dacara 
Matagumpay na naisagawa ng Armed Forces of the Philippines (AFP) at Philippine Coast Guard (PCG) ang resupply mission para sa mga sundalong nakatalaga sa BRP Sierra Madre (LS-57) sa Ayungin Shoal noong Setyembre 26, dalawang buwan matapos ang huling misyon.
Sa isang video na inilabas ng AFP, makikita ang civilian vessel na M/V Lapu-Lapu na papalapit sa BRP Sierra Madre. Ayon kay AFP spokesperson Col. Francel Margareth Padilla, naihatid ng militar ang mga “mahahalagang suplay” at matagumpay na natapos ang misyon.
“Kumpirmado ang presensya ng mga barko ng Tsina sa paligid ng Ayungin Shoal habang isinasagawa ang misyon. Hanggang walong barkong Tsino ang namonitor sa lugar, ngunit hindi sila nagbigay ng banta sa ating misyon at ligtas na naisagawa ng ating mga tauhan ang resupply para masustentuhan ang ating presensya sa shoal,” pahayag ni Padilla sa Philippine News Agency.
Sa isang pahayag naman noong Biyernes, sinabi ni AFP Public Affairs Office Chief Col. Xerxes Trinidad na patuloy na susuportahan ng militar ang mga tropa na nakatalaga sa BRP Sierra Madre.
Ang huling resupply mission para sa BRP Sierra Madre ay isinagawa noong Hulyo 27, mahigit isang buwan matapos ang marahas na insidente noong Hunyo 17, kung saan hinarang at pinasok ng China Coast Guard ang mga barkong Pilipino na nagsasagawa ng supply mission doon. Isang Pilipinong marino ang nawalan ng bahagi ng kanyang hinlalaki nang tutukan sila ng armas ng mga puwersa ng Tsina.
Laging nakatutok sa Pwersa Balita para sa mga balita na dapat mong malaman! Kami ang Pwersa Balita! Bisitahin rin ang aming mga social media accounts:
Kenneth Marcos