By Arvie Jane Dacara 
Umabot na sa 98 katao ang kumpirmadong nasawi matapos bumagsak ang bubong ng isang kilalang nightclub sa Dominican Republic habang ginaganap ang isang konsiyerto nitong Martes, ayon sa opisyal na tala ng mga awtoridad.
Ayon kay Juan Manuel Mendez, direktor ng Emergency Operations Center ng bansa, patuloy ang rescue operations, subalit hindi pa rin tiyak kung ilang tao ang naroroon sa loob ng Jet Set nightclub nang mangyari ang insidente.
Bukod sa mga nasawi, tinatayang 160 katao ang sugatan. Higit sa 370 emergency personnel at 150 ambulansya ang naka-deploy sa lugar upang tumulong sa paghahanap ng mga posibleng survivor. Nagkakaisa rin ang mga kaanak ng mga nawawala sa paghahanap ng kanilang mahal sa buhay.
Dalawa sa mga nasawi ay dating manlalaro sa Major League Baseball (MLB)—sina Octavio Dotel at Tony Blanco—na parehong nasa nightclub nang maganap ang trahedya habang tumutugtog ang sikat na merengue singer na si Rubby Perez.
Si Dotel, dating pitcher na naglaro sa MLB mula 1999 hanggang 2013 para sa 13 koponan, ay bahagi ng St. Louis Cardinals na nagkampeon sa 2011 World Series. Una nang naiulat na nailigtas siya mula sa guho, subalit kalaunan ay kumpirmadong nasawi habang isinusugod sa ospital.
Naglabas ng pahayag ang Houston Astros, ang koponan ni Dotel mula 2000 hanggang 2004, sa X (dating Twitter):
“Lubos kaming nalulungkot sa balitang isa si Octavio Dotel sa mga nasawi sa pagbagsak ng bubong sa kanyang bayan sa Dominican Republic kagabi.”
Si Tony Blanco naman ay isang infielder at outfielder na naglaro ng siyam na season sa MLB at walong taon sa Japan. Isa siya sa mga manlalaro ng Washington Nationals at nag-debut noong 2005.
Kinumpirma rin ng gobyerno na kabilang sa mga nasawi ang gobernador ng Monte Cristi province na si Nelsy Cruz.
Ayon pa kay Mendez, “Patuloy naming nililigtas ang mga taong buhay pa at inaabot namin ang mga nangangailangan. Nakatuon kami sa mga naririnig naming humihingi ng tulong sa ilalim ng guho.”
Isang temporary morgue at blood donation center ang itinayo malapit sa lugar ng insidente.
Samantala, naglunsad na ng imbestigasyon ang Ministry of Public Works upang alamin ang sanhi ng pagguho ng estruktura.
Nagdeklara ng tatlong araw na pambansang pagluluksa ang pamahalaan bilang pag-alala sa mga nasawi sa trahedya.
Laging nakatutok sa Pwersa Balita para sa mga balita na dapat mong malaman! Kami ang Pwersa Balita!
Bisitahin rin aming mga social media accounts:
Facebook | YouTube | X | TikTok | Instagram | Threads
Kenneth Marcos