By Arvie Jane Dacara 
May probable cause na nakita ang mga state prosecutors upang sampahan ng kasong kidnapping at dalawang bilang ng robbery ang walong kasapi ng Eastern Police District (EPD) dahil sa umano’y iligal na operasyon at pagnanakaw ng humigit-kumulang ₱85 milyon mula sa isang negosyanteng Tsino sa Las Piñas City.
Ayon kay Maj. Gen. Anthony Aberin, Director ng National Capital Region Police Office (NCRPO), isinampa na nitong Huwebes sa korte ng Office of the City Prosecutor ang reklamo laban sa walong pulis na mula sa District Special Operations Unit (DSOU) ng EPD.
Batay sa imbestigasyon, nagsagawa ng iligal na operasyon ang mga suspek noong Abril 2, gamit ang isang pekeng arrest warrant laban sa negosyante.
Sa salaysay ng biktima at ng kanyang mga kaanak, pinatay ng mga pulis ang kanilang CCTV, sapilitang binuksan ang kanilang vault, at ninakaw ang salaping nasa pesos, US dollars, at Malaysian ringgit, gayundin ang mga alahas, gadget, at iba pang personal na gamit na tinatayang aabot sa ₱85 milyon ang halaga.
“Maliwanag ang aming paninindigan – hindi kinukunsinti ng NCRPO ang anumang maling gawain. Sisiguraduhin naming masampahan ng matibay na kaso ang mga tiwaling pulis,” diin ni Aberin.
Dagdag pa niya, magsasagawa rin ng administratibong imbestigasyon na posibleng magresulta sa tuluyang pagpapatalsik sa serbisyo ng mga sangkot, base sa ebidensiya at naaayon sa batas.
Nauna nang inanunsyo ng tagapagsalita ng Philippine National Police (PNP) na si Brig. Gen. Jean Fajardo na ang dating commander ng DSOU na si Maj. Emerson Coballes ay idineklara nang AWOL (absent without official leave) matapos hindi sumunod sa return-to-work order mula sa NCRPO.
Natuklasan ng NCRPO na ang isinagawang raid sa tahanan ng negosyanteng Tsino ay bahagi umano ng planong pagnanakaw, at hindi talaga akma sa inisyung warrant ang pagkakakilanlan ng biktima.
Inihayag ni Aberin na nakatakda ang preliminary investigation sa reklamo laban kay Coballes sa Abril 22 at 29.
Samantala, ang walong pulis ay kasalukuyang nakakulong sa Las Piñas City custodial facility at nahaharap din sa mga hiwalay na kasong administratibo na maaaring magresulta sa kanilang pagtanggal sa serbisyo.
Ayon sa PNP Internal Affairs Service, palalawakin pa ang imbestigasyon upang masaklaw ang iba pang pulis na posibleng sangkot sa insidente.
Laging nakatutok sa Pwersa Balita para sa mga balita na dapat mong malaman! Kami ang Pwersa Balita!
Bisitahin rin aming mga social media accounts:
Facebook | YouTube | X | TikTok | Instagram | Threads
Kenneth Marcos