By Arvie Jane Dacara 
Nagpahayag ng matinding pag-aalala si Senate Minority Leader Aquilino “Koko” Pimentel III kaugnay ng pagkalat ng mga substandard na bakal o rebar sa merkado, na banta sa kaligtasan ng mga gusali at imprastraktura. Nanawagan siya sa Department of Trade and Industry (DTI) na agad suspendihin ang mga permit at lisensya ng mga kumpanyang sangkot sa pag-import at pagbebenta ng mga depektibong materyales.
“Alam natin kung saan galing ang mga ito. Dapat may managot!” mariing pahayag ni Pimentel.
Ang panawagan ng senador ay nag-ugat mula sa mga natuklasang substandard na rebar sa Mindanao at Northern Luzon sa pagsisiyasat ng DTI at Philippine Iron and Steel Institute (PISI). Ang mga bakal na ito ay hindi nakakatugon sa minimum na pamantayan sa timbang at kalidad, na dahilan ng pagkapinsala sa structural integrity ng mga gusali.
“Hindi lang ito problema ng mga pribadong bahay kundi pati mga pampublikong pasilidad gaya ng kalsada, tulay, paaralan, at mga gusali,” dagdag ni Pimentel.
Lalo pa itong nagbibigay-alala sa mga lugar na malapit sa Valley Fault System, tulad ng Marikina, na lubhang bulnerable sa lindol. Binigyang-diin ng senador na kinakailangang masiguro ang kaligtasan ng publiko sa pamamagitan ng mahigpit na pagbabantay sa kalidad ng mga materyales sa konstruksyon.
“Ang pagsuspinde sa mga lisensya ng mga manufacturer at importer ng substandard na rebar ay isang mahalagang hakbang upang matigil ang pagkalat nito sa merkado,” aniya.
Ang panawagan ni Pimentel ay isang paalala na ang kaligtasan ng sambayanan ay dapat maging pangunahing prayoridad sa lahat ng proyekto at pagtatayo. Nanawagan din siya sa mga mamamayan at sektor ng konstruksyon na maging maingat at responsable sa pagpili ng mga materyales upang masiguro ang maayos at ligtas na mga imprastraktura para sa kinabukasan.
Laging nakatutok sa Pwersa Balita para sa mga balita na dapat mong malaman! Kami ang Pwersa Balita! Bisitahin rin ang aming mga social media accounts:
admin