By Arvie Jane Dacara 
Inaasahan ang mas maraming dayuhang pamumuhunan para sa Pilipinas matapos ang matagumpay na paglahok ng bansa sa World Economic Forum (WEF) Annual Meeting 2025 sa Davos, Switzerland.
Ayon kay Speaker Ferdinand Martin Romualdez, ang mga produktibong pakikipag-ugnayan ng delegasyon ng Pilipinas sa forum ay magdadala ng mas maraming trabaho at magpapalago sa ekonomiya ng bansa.
“Pinatunayan ng mga talakayan sa Davos ang napakalaking potensyal ng Pilipinas bilang pangunahing destinasyon ng pandaigdigang pamumuhunan,” ani Romualdez sa isang pahayag nitong Linggo.
Nagpasalamat din siya kay Pangulong Ferdinand R. Marcos Jr. para sa pagpapadala ng delegasyon na nagpakita ng mga dahilan kung bakit dapat piliin ng mga dayuhang mamumuhunan ang Pilipinas.
“Napakaganda ng naging pagtanggap sa atin, at tiwala akong magreresulta ito sa mas maraming pamumuhunan na magpapalakas sa ating ekonomiya,” dagdag niya.
Pagsulong ng Ekonomiya
Pinuri ni Romualdez ang mga miyembro ng delegasyon na kinabibilangan nina Finance Secretary Ralph Recto, Trade and Industry Secretary Ma. Cristina Roque, at ilang lider ng negosyo mula sa iba’t ibang sektor, para sa kanilang pagsisikap na itaguyod ang ekonomiya ng Pilipinas.
“Pinapupurihan ko ang aking mga kapwa delegado para sa kanilang hindi matatawarang pagsisikap at mahalagang ambag sa pagpapataas ng interes ng mundo sa Pilipinas,” sabi niya.
Binanggit din niya ang mga programa gaya ng CREATE MORE (Corporate Recovery and Tax Incentives for Enterprises to Maximize Opportunities for Reinvigorating the Economy) Law at ang Maharlika Investment Fund bilang mga konkretong halimbawa ng pro-business policies ng bansa.
Mahahalagang Pakikipagtagpo
Nakiisa si Romualdez sa mga diskusyon kasama ang mga kilalang global business leaders at opisyal. Isa siya sa mga panelista sa Stakeholder Dialogue na may temang “Navigating Asia’s Hotspots,” kung saan ipinakita niya ang balanseng geopolitical approach ng Pilipinas at ang dedikasyon nito sa ekonomiyang katatagan.
“Malinaw naming naipakita ang kuwento ng Pilipinas bilang maaasahang kasosyo sa rehiyon ng Indo-Pacific, hindi lamang sa usaping geopolitical kundi pati sa ekonomiya. Ang layunin natin ay kapayapaan, katatagan, at kooperasyon na mahalaga para sa pangmatagalang pag-unlad,” pahayag ni Romualdez.
Pinangunahan din ng delegasyon ang Philippine Breakfast Interaction na dinaluhan ng halos 50 pandaigdigang lider mula sa pampubliko at pribadong sektor.
Kabilang sa mga prominenteng dumalo sina Marcus Wallenberg, chairman ng Skandinaviska Enskilda Banken; Philippe Amon, chairman at CEO ng SICPA SA; Anthony Tan, CEO ng Grab; at Tony Fernandes, CEO ng AirAsia.
Sa mga talakayan, binigyang-diin ng delegasyon ang mabilis na paglago ng digital economy ng Pilipinas, na naging pinakamabilis sa Timog-Silangang Asya noong 2024.
Handa ang Pilipinas
Inilahad din ng delegasyon ang mga repormang pang-ekonomiya sa ilalim ng administrasyong Marcos, kabilang ang CREATE MORE law na naglalayong pabilisin ang pamumuhunan sa bansa sa pamamagitan ng pagbibigay ng mas mataas na tax incentives at pag-streamline ng proseso ng pag-apruba ng mga pamumuhunan.
Sinabi ni Romualdez na muling inilagay ng WEF ang Pilipinas sa radar ng global investors, na nagbibigay ng mas maraming oportunidad para sa bansa na nakahandang gawing kongkretong pamumuhunan ang mga ito upang mapabilis ang pag-unlad.
Laging nakatutok sa Pwersa Balita para sa mga balita na dapat mong malaman. Kami ang Pwersa Balita! Bisitahin rin ang aming mga social media accounts:
Kenneth Marcos