By Arvie Jane Dacara 
Isang malaking hakbang para sa kabuhayan ng mga mangingisda ang inilunsad ng Pamahalaang Lungsod ng Surigao katuwang ang Bureau of Fisheries and Aquatic Resources (BFAR) Caraga Region sa pamamagitan ng isang proyektong nagkakahalaga ng humigit-kumulang PHP3.8 milyon.
Ang proyektong tinaguriang Aquaculture and Mariculture Expansion Project (AMEIP) ay layuning paunlarin ang aquaculture sa lungsod, partikular sa Barangay Baybay. Kabilang sa tulong na ipagkakaloob ang dalawang 10-metrong fish cage na may kasamang lambat at mooring systems, 40,000 na bangus fingerlings, at 1,528 bag ng pakain para sa mga isda.
Ayon kay Merry Flor Lipio, pangulo ng Baybay Lobster Culturist Association, malaking tulong ito sa kanilang produksyon at makakatulong din upang mabawasan ang pagdepende sa huli mula sa dagat.
“Malaking ginhawa ito para sa amin. Mas mapapalakas namin ang produksyon nang hindi nasasagad ang likas na yaman ng karagatan,” ani Lipio sa isang panayam nitong Martes.
Pinirmahan ang kasunduan noong Lunes sa Surigao City Hall nina BFAR-13 Regional Director Omnia Olama at Vice Mayor Alfonso Casurra.
Ayon sa mga opisyal ng lungsod, layunin ng proyekto na madagdagan ng 30 porsyento ang lokal na suplay ng isda habang lumilikha rin ng sustainable na kabuhayan para sa mga komunidad sa baybaying dagat.
Tinatayang mahigit 200 pamilyang mangingisda sa Barangay Baybay at mga kalapit na lugar ang direktang makikinabang sa proyektong ito, batay sa pagsusuri ng BFAR.
Laging nakatutok sa Pwersa Balita para sa mga balita na dapat mong malaman — kami ang Pwersa Balita!
Bisitahin rin aming mga social media accounts:
🌐 Facebook
📺 YouTube
🐦 X (Twitter)
🎵 TikTok
📸 Instagram
🧵 Threads
Kenneth Marcos