By Kenneth Marcos 
Sa likod ng bawat sako ng ligtas at dekalidad na binhi ay ang tahimik ngunit mahalagang trabaho ng mga crop technicians na araw-araw humaharap sa banta ng peste sa bukid. Sa layuning mapanatili ang mataas na ani at maayos na kalagayan ng mga binhi, isinagawa ng PhilRice Central Experiment Station (CES) ang serye ng pest monitoring at retooling training para sa kanilang tauhan sa Agusan, Samar, at Mindoro.
Ang aktibidad ay pinangunahan ng Crop Health Monitoring Team ng PhilRice-CES upang palakasin ang kakayahan ng mga personnel sa tamang pagtukoy, pag-monitor, at pamamahala ng mga peste sa kanilang mga lokal na taniman ng binhi. Bahagi ito ng mas malawak na kampanya ng institusyon para sa “Laban Kontra Peste, Ligtas na Binhi, at Siguradong Ani.”
Paghahanda laban sa peste gamit ang makabagong teknolohiya
Sa nasabing pagsasanay, 58 personnel mula sa tatlong PhilRice stations ang nakiisa—18 mula sa Samar, 10 mula sa Mindoro, at 30 mula sa Agusan. Tinuruan sila ng tamang paraan ng pagkilala sa iba’t ibang uri ng peste, buwanang pagkalap ng datos mula sa field, at paggamit ng Pest Risk Identification and Management (PRIME) app. Ang PRIME ay isang makabagong digital tool na tumutulong sa mabilisang pagpadala at pagsusuri ng pest-related data.
Gamit ang PRIME, mas madali na ngayong maipon at maipadala ang impormasyon sa mga mananaliksik na bumubuo ng pest bulletins at rekomendasyon sa pamahalaan at mga magsasaka. Mas episyente rin itong gabay sa agarang interbensyon sakaling may outbreak ng peste.
Tamang kaalaman, tamang kilos
Hindi lang basta training ang isinagawa—tinuruan din ang mga kalahok ng pagbuo ng pest management plans batay sa real-time at historical data ng kanilang istasyon. Sa tulong ng mga datos mula sa mga nakaraang taniman, mas naiaangkop ang mga plano sa aktwal na kalagayan sa field.
Ayon sa PhilRice, ang regular na pest monitoring ay isang mahalagang sangkap ng crop health management. Sa pamamagitan ng buwanang pest bulletins, mas napapanatiling protektado ang mga binhi laban sa pinsala na dulot ng insekto, fungal infections, at iba pang peste. Ibig sabihin, mas mataas ang tsansa ng matagumpay na ani.
Mas ligtas at mataas na ani, mas malawak na benepisyo
Sa huli, ang tagumpay ng ganitong inisyatibo ay hindi lamang nasusukat sa bilang ng mga na-train na personnel kundi sa dami ng mas ligtas at episyenteng binhi na maipapamahagi sa mga magsasaka sa buong bansa. Dahil dito, mas matibay ang ating rice seed system—isang pundasyon ng food security ng Pilipinas.
Ang patuloy na pagsasanay at inobasyon sa larangan ng agrikultura ay mahalagang hakbang upang matulungan ang mga magsasaka, lalo na sa mga probinsya, na makamit ang masaganang ani sa kabila ng mga hamon sa klima at peste.
Pwersa Balita – Your Trusted Source in Agri News