By Arvie Jane Dacara 
Bumagal ang headline inflation ng bansa sa 3.3 porsyento nitong Agosto, mula sa 4.4 porsyento noong Hulyo, ayon sa Philippine Statistics Authority (PSA). Ang pagbaba ay pangunahing dahil sa pagbagal ng pagtaas ng presyo ng pagkain. Ayon kay National Statistician Dennis Mapa, mas mababa rin ito kumpara sa 5.3 porsyento na naitala noong Agosto ng nakaraang taon.
Dahil dito, umabot na sa 3.6 porsyento ang year-to-date na headline inflation, na pasok sa target ng gobyerno na 2 hanggang 4 porsyento.
Ayon kay Mapa, ang pagbaba ng inflation ay sanhi ng mas mabagal na pagtaas ng presyo ng mga pagkain at inumin na hindi nakalalasing, mula sa 6.4 porsyento noong Hulyo hanggang 3.9 porsyento nitong Agosto. Partikular, bumaba ang food inflation sa 4.2 porsyento mula 6.7 porsyento.
Ang pagbaba ng presyo ng bigas, mula 20.9 porsyento noong Hulyo patungo sa 14.7 porsyento nitong Agosto, ang isa sa mga pangunahing dahilan ng mas mababang food inflation. Sinabi ni Mapa na inaasahang lalo pang bababa ang rice inflation sa mga susunod na buwan.
Bukod sa bigas, bumaba rin ang presyo ng mga gulay, root crops, at iba pang produktong pang-agrikultura. Bumagal din ang pagtaas ng presyo ng harina, tinapay, at iba pang produktong cereal, pati na ang mga karne at iba pang produktong pagkain.
Samantala, ang core inflation, na hindi kasama ang mga piling pagkain at enerhiya, ay bumaba sa 2.6 porsyento noong Agosto mula 2.9 porsyento noong nakaraang buwan.
Sa hiwalay na pahayag, sinabi ng National Economic and Development Authority (NEDA) na ang patuloy na pagbaba ng inflation at ang pag-stabilize ng mga presyo ay malaking tulong sa mga pamilya at negosyo, na magtutulak ng mas mataas na consumer spending at magsusulong ng masiglang aktibidad sa ekonomiya.
Ayon kay NEDA Secretary Arsenio Balisacan, “Ang patuloy na pagbaba ng inflation ay makakatulong sa paglago ng household consumption, lalo na’t ang mataas na presyo ay matagal nang nagpapahirap sa mga pamilyang mababa ang kita. Ang pagbaba ng food inflation ay malaking tulong sa mga low-income households na ang pagkain ay bumubuo ng 51.4 porsyento ng kanilang konsumo.”
Dagdag pa ni Balisacan, habang bumababa ang inflation, kailangan pa ring bantayan ang posibleng epekto ng mas mataas na singil sa kuryente at abnormal na panahon dulot ng La Niña. Ang pamahalaan ay naglatag na ng mga hakbang upang harapin ang mga banta, kabilang ang mga maagang babala sa pagbukas ng mga dam, at pakikipagtulungan sa mga LGUs para sa impormasyon ukol sa mga sakuna.
Dagdag pa rito, plano ng Department of Agriculture (DA) na palawakin ang Kadiwa ng Pangulo program sa Visayas at Mindanao para mas mapadali ang access ng mga mamamayan sa abot-kayang produktong pang-agrikultura.
Laging nakatutok sa Pwersa Balita para sa mga balita na dapat mong malaman! Kami ang Pwersa Balita! Bisitahin rin ang aming mga social media accounts:
- https://www.facebook.com/PwersaBalita/
- www.youtube.com/@pwersabalita
- https://x.com/PwersaBalita
- https://www.tiktok.com/@pwersabalita
- https://www.instagram.com/pwersabalita/
- https://www.threads.net/@pwersabalita
Kenneth Marcos