By Arvie Jane Dacara 
Ayon sa Office of Civil Defense (OCD), tinitiyak na nila ang mga kinakailangang hakbang upang masiguro ang kaligtasan ng mga residente sa mga lugar na apektado ng pag-aalburuto ng Bulkang Taal.
Sinabi ni OCD Administrator Undersecretary Ariel Nepomuceno, “Mahigpit na binabantayan ng OCD, National Disaster Risk Reduction and Management Council (NDRRMC), at ng aming mga kasamahan sa lokal at rehiyonal na pamahalaan sa Calabarzon ang sitwasyon. Ayon kay Pangulong (Ferdinand R.) Marcos Jr., may nakahandang mga protokol para sa ganitong sitwasyon. Nakaantabay ang pambansang pamahalaan para sa agarang pagresponde, lalo na kung lumala ang kalagayan.”
Ayon sa Philippine Institute of Volcanology and Seismology (Phivolcs), nagkaroon ng bahagyang phreatomagmatic eruption ang Taal nitong Miyerkules ng hapon, mula 4:21 p.m. hanggang 4:32 p.m., na tumagal ng 11 minuto. Sa kabila nito, nasa Alert Level 1 pa rin ang Taal, na nangangahulugang nananatili itong abnormal at may posibilidad ng mga pagsabog.
Ipinapaalala ng Phivolcs na sa Alert Level 1, maaaring magkaroon ng biglaan at mapaminsalang steam-driven o phreatic explosions, mga lindol na dulot ng bulkan, minor na pagbagsak ng abo, at mapanganib na konsentrasyon o pagsabog ng mga volcanic gas na maaaring magbanta sa paligid ng isla ng Taal.
Samantala, pinalakas ng Regional Disaster Risk Reduction and Management Council (RDRRMC) Calabarzon ang mga kautusan ukol sa “No Human Settlement Area” sa paligid ng Taal Volcano Protected Landscape (TVPL) batay sa Resolutions No. 65 (2020) at 01 (2021) ng Protected Area Management Board (PAMB). Mahigpit na ipinagbabawal ng mga nasabing resolusyon ang anumang uri ng paninirahan sa isla upang matiyak ang kaligtasan ng publiko at mapanatili ang kalikasan sa nasabing lugar.
Pinapayuhan ng pamahalaan ang publiko na iwasang pumasok sa Permanent Danger Zone (PDZ) ng Taal, lalo na sa paligid ng Main Crater at Daang Kastila fissure. Mahigpit ding pinapaalalahanan ang mga residente na maging mapagmatyag, sumunod sa mga abiso ng mga kinauukulan, at gawin ang mga kinakailangang pag-iingat.
Laging nakatutok sa Pwersa Balita para sa mga balita na dapat mong malaman! Kami ang Pwersa Balita! Bisitahin rin ang aming mga social media accounts:
Kenneth Marcos