By Arvie Jane Dacara 
Bumisita ang mga mataas na opisyal ng depensa at militar para inspeksyunin ang mga kasalukuyang proyekto sa mga pangunahing pasilidad ng Navy sa Oyster Bay, Palawan nitong Huwebes.
Ayon sa pahayag ni Col. Xerxes Trinidad, hepe ng Public Affairs Office ng Armed Forces of the Philippines (AFP), ang inspeksyon na pinangunahan ni Defense Secretary Gilberto Teodoro Jr. at AFP chief Gen. Romeo Brawner Jr. ay layuning suriin ang mga kasalukuyang imprastrukturang proyekto na mahalaga upang mapalakas ang depensa ng bansa laban sa mga panlabas na banta.
Dagdag pa ni Trinidad, ang Oyster Bay facility, kasama ang mga proyekto sa bayan ng Balabac, ay kabilang sa mga prayoridad na ipinag-utos ni Pangulong Ferdinand Marcos Jr. na pabilisin ang konstruksyon upang mas mapaigting ang kakayahan ng Pilipinas sa panlabas na depensa.
Hindi tinukoy ang mga detalye ng mga naturang proyekto para sa seguridad.
“Ito ay may mahalagang papel at kritikal sa depensa upang protektahan ang karapatan ng Pilipinas sa West Philippine Sea,” binigyang-diin ni Trinidad.
Ang Balabac ay inaasahang magiging susunod na forward operating base ng Philippine Air Force, na magpapalawak ng kakayahan ng bansa sa depensa sa himpapawid.
“Ang pagbisitang ito ay nagpapalakas ng pangako ng Department of National Defense at AFP na paunlarin ang imprastruktura ng militar ng Pilipinas at tiyaking protektado ang soberanya ng bansa sa harap ng mga nagbabagong hamon sa seguridad,” ayon kay Trinidad.
Laging nakatutok sa Pwersa Balita para sa mga balita na dapat mong malaman! Kami ang Pwersa Balita! Bisitahin rin aming mga social media accounts:
https://www.facebook.com/PwersaBalita/
www.youtube.com/@pwersabalita
https://x.com/PwersaBalita
https://www.tiktok.com/@pwersabalita
https://www.instagram.com/pwersabalita/
https://www.threads.net/@pwersabalita
Kenneth Marcos