Mas Maikling Pila sa MRT-3, Naobserbahan Matapos ang Deployment ng Mas Mahahabang Tren sa Rush Hour

Mas mabilis na ang daloy ng mga pasahero sa MRT-3 matapos maglunsad ang Department of Transportation (DOTr) ng tatlong tren na may apat na bagon tuwing rush hour, ayon kay Transportation Secretary Vince Dizon.

Ang obserbasyon ay ginawa sa isinagawang inspeksyon ni Dizon kasama sina Department of Information and Communications Technology (DICT) Secretary Henry Aguda at MRT-3 General Manager Michael Capati nitong Lunes.

“Ito ay tugon ng DOTr sa direktiba ng Pangulo na gawing mas magaan ang araw-araw na biyahe ng ating mga komyuter. Bukod dito, layunin din nating mapabuti ang daloy ng mga pasahero at mapababa ang paghihintay sa bawat istasyon,” pahayag ni Dizon.

Cashless Ticketing, Isinusulong na Rin

Bukod sa deployment ng mas mahahabang tren, pinag-aaralan din ng DOTr at MRT-3 ang paggamit ng cashless payment system para sa pagbili ng single-journey tickets, bilang bahagi ng pagpapabilis ng serbisyo.

Detalye ng Deploy ng Apat na Bagon

Nagsimula ang paggamit ng mga apat na bagon ng tren nitong Lunes, mula 7:00 AM hanggang 9:00 AM, at 5:00 PM hanggang 7:00 PM, eksaktong tugma sa mga oras ng dagsa ng pasahero. Bukod sa bagong configuration, mayroong 16 tren pa rin ang MRT-3 na nananatiling may tatlong bagon.

Ang bawat bagon ay may kapasidad na 394 na pasahero, kaya’t ang apat na bagon ay kayang magsakay ng humigit-kumulang 1,576 na pasahero kada biyahe.

Mas Maayos na Operasyon Matapos ang Maintenance

Ang deployment ng mas mahahabang tren ay kasunod ng Holy Week maintenance ng MRT-3, kung saan isinailalim sa annual preventive maintenance ang lahat ng sistema ng linya upang matiyak ang ligtas at maayos na operasyon.

Noong Marso, pinalawig din ng MRT-3 ang operating hours tuwing gabi ng karagdagang isang oras sa weekdays, batay sa unang inspeksyon ni Dizon at konsultasyon niya sa mga komyuter.

Laging nakatutok sa Pwersa Balita para sa mga balita na dapat mong malaman! Kami ang Pwersa Balita!
Bisitahin rin aming mga social media accounts:
Facebook | YouTube | X | TikTok | Instagram | Threads