Klase at Trabaho sa Gobyerno Suspendido sa Metro Manila Dahil sa Habagat

Inanunsyo ng Malacañang ngayong Miyerkules ang pagsuspinde ng klase sa mga pampublikong paaralan at trabaho sa mga ahensya ng gobyerno sa Metro Manila dahil sa epekto ng southwest monsoon o “habagat.”

Simula alas-7 ng umaga, ipinag-utos ng Presidential Communications Office (PCO) ang suspensyon ng trabaho at klase sa mga nabanggit na lugar, ayon sa kanilang post sa Facebook. Kumpirmado rin ito sa pamamagitan ng text message mula kay Executive Secretary Lucas Bersamin.

Ayon sa rekomendasyon ng National Disaster Risk Reduction and Management Council (NDRRMC), inirekomenda ang pagsuspinde ng klase at trabaho dahil sa inaasahang pag-ulan at posibleng flash floods na dala ng habagat sa Metro Manila. Sinabi ng NDRRMC na ang suspensyon ay makakatulong upang maiwasan ang anumang hindi inaasahang insidente at masiguro ang kaligtasan ng publiko.

Base sa rekomendasyon ng NDRRMC, ang desisyon para sa suspensyon ng trabaho sa mga pribadong kompanya at opisina ay nakaatang sa kanilang mga namumuno.

Samantala, inihayag ng mga lokal na pamahalaan ng Caloocan, Las Piñas, Malabon, Mandaluyong, Maynila, Marikina, Muntinlupa, Navotas, Parañaque, Pasay, Pasig, Pateros, Quezon City, San Juan, Taguig, at Valenzuela ang suspensyon ng klase sa kani-kanilang social media accounts.

Sa Lungsod ng Maynila, parehong face-to-face at online classes ay kinansela. Ayon sa Manila Public Information Office (PIO), “Suspendido ang lahat ng antas ng klase, pampubliko man o pribado, face-to-face at online classes.”

Pinayuhan ng Pamantasan ng Lungsod ng Maynila ang kanilang mga mag-aaral na kinansela rin ang lahat ng graduation-related activities na nakatakda sana ngayong Miyerkules. Ayon sa PIO, magbibigay sila ng bagong iskedyul para sa mga nasabing aktibidad.

Naiulat din na 16 na lugar sa lungsod ang binaha simula alas-5 ng umaga, bunga ng malakas na ulan mula kagabi. Ang mga baha ay umabot na sa gutter level sa Adriatico Street, Padre Faura, mga kalsada malapit sa LRT Quirino Station, P. Ocampo hanggang Roxas Streets, bahagi ng Taft Avenue at España Street, Lacson at Dela Fuente Streets.

Sa Lungsod ng Marikina, suspendido rin ang face-to-face classes, subalit isasagawa ang asynchronous classes. “Suspendido ang face-to-face classes at reverting to asynchronous classes sa LAHAT NG ANTAS, PAMPUBLIKO O PRIBADONG PAARALAN bunsod ng YELLOW WARNING na inisyu ng PAGASA sa NCR,” ayon sa Marikina PIO.

Ayon sa PAGASA, as of alas-8 ng umaga, naglabas sila ng yellow rainfall warning para sa Metro Manila at mga probinsya ng Zambales at Bataan. Inaasahan ang 7.5 mm hanggang 15 mm na ulan sa loob ng isang oras at magpapatuloy pa ito sa susunod na dalawang oras.

Laging nakatutok sa Pwersa Balita para sa mga balita na dapat mong malaman! Kami ang Pwersa Balita! Bisitahin rin ang aming mga social media accounts: Facebook, YouTube, X, TikTok, Instagram, Threads.