By Arvie Jane Dacara 
Habang papalapit ang Pasko at Bagong Taon, muling ipinaalala ng pamahalaang lungsod ng Davao sa mga Dabawenyo ang parusa sa paglabag sa firecracker ban ordinance.
Sa isang pahayag nitong Martes, nanawagan si Mayor Sebastian Duterte sa mga residente na sumunod sa batas upang matiyak ang kanilang kaligtasan.
“Ang mahalaga ay sumunod kayo sa batas dahil kapag nahuli kayo, may kaukulang multa at maaaring makulong. Sumunod tayo para sa ikabubuti at kaligtasan nating lahat,” ayon kay Mayor Duterte.
Nilalaman ng Ordinansa
Ipinagbabawal ng City Ordinance 060-02 ang paggawa, pagbebenta, pagbili, pagmamay-ari, at paggamit ng paputok at iba pang pyrotechnic devices sa lungsod ng Davao.
Parusa sa mga Lalabag:
- Unang Pagkakasala: Multa na PHP1,000 o pagkakakulong ng 20 hanggang 30 araw, o parehong parusa.
- Ikalawang Pagkakasala: Multa na PHP3,000 o pagkakakulong ng isa hanggang tatlong buwan, o parehong parusa.
- Ikatlong Pagkakasala: Multa na PHP5,000 o pagkakakulong ng tatlo hanggang anim na buwan, o parehong parusa.
Layunin ng Pagbabawal
Ang naturang pagbabawal ay bahagi ng matagal nang programa ng lungsod upang mapabuti ang kaligtasan ng publiko at mabawasan ang mga insidente ng mga pinsalang dulot ng paputok, lalo na tuwing kapaskuhan at pagpasok ng Bagong Taon.
Ayon sa pamahalaang lungsod, mahigpit na ipinatutupad ang ordinansa sa mga nagdaang taon, na naging epektibo sa pagbabawas ng mga aksidente at insidente ng pagkamatay na dulot ng paputok sa Davao City.
Laging nakatutok sa Pwersa Balita para sa mga balita na dapat mong malaman. Kami ang Pwersa Balita! Bisitahin rin ang aming mga social media accounts:
Kenneth Marcos