By Arvie Jane Dacara 
Magkakaroon ng makasaysayang pagkilala sa NBA star na si Derrick Rose matapos ipahayag ng Chicago Bulls na ireretiro nila ang kanyang jersey bilang paggalang sa kanyang kahanga-hangang karera sa koponan.
Sa isang pahayag noong Sabado, sinabi ng Chicago Bulls:
“Opisyal nang ireretiro ang No. 1 jersey ni Derrick Rose, ginagawang panglimang manlalaro ng Bulls na makakatanggap ng ganitong karangalan mula sa prangkisa. Ang seremonya ng pagreretiro ng Rose jersey ay gaganapin sa susunod na NBA season (2025-26), at ang mga detalye ay iaanunsyo sa ibang araw.”
Si Rose, na tubong Chicago, ay naglaro para sa Bulls mula 2008 hanggang 2016. Matapos ang kanyang huling season sa koponan, nagkaroon siya ng dalawang stint kasama ang New York Knicks at naglaro rin para sa Cleveland Cavaliers, Minnesota Timberwolves, Detroit Pistons, at Memphis Grizzlies.
Ang dynamic na guard ay napili bilang unang overall pick sa 2008 NBA draft at kinilala bilang pinakabatang most valuable player (MVP) sa kasaysayan ng liga noong 2011 sa edad na 22. Siya rin ay kabilang sa 2011 All-NBA First Team.
Naging Rookie of the Year si Rose noong 2009 at pormal na nagretiro noong Setyembre matapos ang 16 na taong karera sa NBA.
Sa kanyang jersey retirement, sasamahan ni Rose sina Jerry Sloan (No. 4), Bob Love (No. 10), Michael Jordan (No. 23), at Scottie Pippen (No. 33) bilang mga Bulls legends na may na-retire na jersey ng prangkisa.
Laging nakatutok sa Pwersa Balita para sa mga balita na dapat mong malaman. Kami ang Pwersa Balita! Bisitahin rin ang aming mga social media accounts:
Kenneth Marcos