By Arvie Jane Dacara 
Nilagdaan ni Pangulong Ferdinand R. Marcos Jr. nitong Lunes ang Republic Act 12078 o Agricultural Tariffication Act na layong amyendahan ang Rice Tariffication Law (RTL) upang masiguro ang sapat na suplay ng pagkain at mapababa ang presyo ng bigas.
Sa kanyang talumpati sa Malacañang, sinabi ng Pangulo na ang bagong batas ay magpapalawig sa implementasyon ng Rice Competitiveness Enhancement Fund (RCEF) hanggang 2031 at itataas ang pondo nito mula PHP10 bilyon patungong PHP30 bilyon kada taon.
“Mas marami tayong magagawa para sa ating mga magsasaka. Sisiguraduhin nating may sapat silang mga kagamitan at suporta upang gawing mas maunlad ang industriya ng bigas,” pahayag ni Marcos.
Suporta Para sa Magsasaka
Ang karagdagang pondo ay gagamitin sa mga proyektong prayoridad tulad ng:
- Pagsasanay at extension services
- Pinansyal na tulong sa mga magsasaka na may hanggang dalawang ektaryang lupa
- Pinalawak na credit assistance
- Pagpapahusay ng soil health at pest management
- Pagpapatayo ng solar-powered irrigation systems
- Pagpopondo sa mga composting facilities para sa biodegradable wastes
Pagpapalakas ng Mekanisasyon at Seed Program
Itatampok din ng batas ang pagpapabuti ng Seed Program at Mechanization Program, upang mas maraming magsasaka ang magkaroon ng access sa mataas na kalidad na binhi at makabagong kagamitan para sa mas mataas na ani.
Regulasyon ng Industriya ng Bigas
Ipinaliwanag ni Marcos na palalakasin din ng bagong batas ang kakayahan ng Department of Agriculture (DA) sa pagsubaybay sa sistema at patakaran ng industriya ng bigas. Sa panahon ng biglaang kakulangan ng suplay o pagtaas ng presyo ng bigas, ang DA ay magkakaroon ng kapangyarihang kumilos upang mapatatag ang merkado.
Magsasagawa rin ang Bureau of Plant Industry ng inspeksyon sa mga bodega ng bigas at pamamahala ng pambansang database upang masubaybayan ang imbakan ng butil at masigurong ligtas ang pagkain para sa publiko.
“Ang batas na ito ay magbibigay-daan upang ang ating mga magsasaka ay umunlad at makapagbigay ng sapat na pagkain para sa ating bansa. Sa pamamagitan ng karagdagang puhunan sa agrikultura at suporta sa mga magsasaka, itinataguyod natin ang mas malakas at mas self-sufficient na Pilipinas,” dagdag ng Pangulo.
Laging nakatutok sa Pwersa Balita para sa mga balita na dapat mong malaman! Kami ang Pwersa Balita! Bisitahin rin ang aming mga social media accounts:
Kenneth Marcos