By Arvie Jane Dacara 
Higit 6,300 agrarian reform beneficiaries (ARBs) sa lalawigan ng Cagayan ang tuluyang napalaya mula sa kanilang utang na umabot sa halagang PHP392,675,939.
Ayon sa Department of Agrarian Reform (DAR), ipinamahagi ang 6,803 Certificates of Condonation with Release of Mortgage (CoCRoM) na sumasaklaw sa 6,303 ektarya ng lupa sa municipal gymnasium ng Solana noong Disyembre 9, 2024.
Pinangunahan nina Senadora Imee Marcos at Agrarian Reform Regional Director Primo Lara ang nasabing distribusyon. “Wala na kayong kailangan bayaran sa lupang ipinagkaloob sa inyo ng pamahalaan. Bukod pa dito, tuluy-tuloy pa nating tutulungan ang mga magsasaka patungo sa pagpapaunlad ng kanilang mga lupain,” pahayag ni Marcos sa mga benepisyaryo.
Ang pamamahagi ng CoCRoM ay bahagi ng pagpapatupad ng Republic Act (RA) 11953 o New Agrarian Emancipation Act (NAEA) na nilagdaan ni Pangulong Ferdinand R. Marcos Jr. noong Hulyo 7, 2023.
Sa ilalim ng RA 11953, napawalang-bisa ang lahat ng utang, kasama na ang interes, multa, at iba pang karagdagang bayarin ng mga ARB. Sakop nito ang mga lupang ipinagkaloob sa ilalim ng Presidential Decree 27 o Tenant Emancipation Law, RA 6657 o Comprehensive Agrarian Reform Law, at RA 9700 o Comprehensive Agrarian Reform Program Extension with Reforms.
Ang NAEA ay makikinabang sa tinatayang 610,054 magsasaka sa buong bansa, na sumasaklaw sa mahigit 1.7 milyong ektarya ng agrarian reform lands. Tinatayang PHP57.65 bilyon ang nabura mula sa mga agrarian arrears.
Bukod sa CoCRoM, ipinamahagi rin ng DAR ang 570 land titles sa 477 ARBs sa Cagayan, na may kabuuang sukat na 444.883 ektarya ng lupa.
Isang seremonya rin ang isinagawa para sa turnover ng limang farm-to-market roads sa mga bayan ng Amulung, Abulug, at Gattaran. Ang proyektong ito, na nagkakahalaga ng PHP80 milyon, ay inaasahang magpapalakas sa produktibidad ng agrikultura at magpapaunlad sa kanayunan ng rehiyon.
Laging nakatutok sa Pwersa Balita para sa mga balita na dapat mong malaman. Kami ang Pwersa Balita! Bisitahin rin ang aming mga social media accounts:
Kenneth Marcos