By Kenneth Marcos 
PASAY CITY – Maagang nagtipon ang mga residente ng Barangay 178 habang may dalang mga sako ng plastik, bote, at iba pang recyclable materials. Sa gitna ng masiglang ingay at maayos na pila, kaakibat ang pagbibigay-impormasyon at halakhak ng kabataan, isinagawa ng Department of Environment and Natural Resources (DENR) MEO-West ang kanilang makabuluhang “Dalaw Turo” program nitong linggo.
Sa pakikipagtulungan ng Metropolitan Manila Development Authority (MMDA) at ng Conservation and Development Division (CDD) ng DENR-NCR, layunin ng programang ito na palawakin ang kaalaman ng publiko sa pangangalaga ng kalikasan at isulong ang aktibong partisipasyon ng komunidad.
Ayon kay MEO-West OIC Director Rodelina M. De Villa, mahalaga ang disiplina, kooperasyon, at pagkakaisa upang mapanatili ang kalinisan at kaayusan sa kapaligiran.
“Hindi lang ito tungkulin ng gobyerno. Lahat tayo, may responsibilidad,” aniya. Nagpasalamat din siya sa MMDA sa pangunguna ni Engr. Hurdy Denosta, at sa CDD sa pamamahagi ng 500 pirasong fruit-bearing trees para sa mga dumalo.
Basura Mo, Grocery Ko
Isa sa mga pinakapinilahan sa programa ang “Basura Mo, Palit Grocery Ko!”—isang inisyatiba ng MMDA kung saan maaaring ipagpalit ng mga residente ang kanilang mga recyclable na basura sa grocery items. Bawat kilo ng basura ay may katumbas na puntos, na maaaring ipalit sa bigas, delata, kape, noodles, at iba pang pangunahing bilihin.
Layunin ng programang ito na ituro ang halaga ng tamang pamamahala ng basura at hikayatin ang mga mamamayan na huwag basta-basta magtapon, kundi mag-recycle.
“Malaking tulong ‘to, lalo na sa amin na may mga anak,” sabi ni Aling Marites, isang nanay mula sa Barangay 178. “May grocery ka na, nakatulong ka pa sa kalikasan.”
Kaalamang Pangkalikasan
Kasabay ng pamimigay ng punong-kahoy at grocery items ay ang environmental education sessions. Ipinaliwanag sa mga residente ang nilalaman ng Republic Act 9275 o Philippine Clean Water Act of 2004, ang epekto ng basura sa Manila Bay, at kung paano makatutulong ang Urban Gardening at Greenspaces sa mga lungsod.
Ang mga ganitong programa ay hindi lamang tumutugon sa isyu ng basura, kundi nagbibigay rin ng long-term na kaalaman sa mga mamamayan upang maging mas responsable sa pangangalaga ng kapaligiran.
Tuloy-tuloy na Suporta
Tiniyak ng DENR MEO-West na magpapatuloy ang kanilang suporta sa mga inisyatiba ng MMDA at iba pang ahensya, lalo na kung ito ay makatutulong sa pagpapanatili ng kalinisan, kaayusan, at pagpapalaganap ng tamang impormasyon ukol sa kalikasan.
Sa mga simpleng hakbang gaya ng pag-recycle, pagtatanim, at pakikiisa sa mga ganitong aktibidad, unti-unti nating naitatama ang matagal nang pagkukulang sa ating kapaligiran.
Pwersa Balita – Your Trusted Source in Agri News