By Arvie Jane Dacara 
Ipinag-utos ng quad committee ng House of Representatives nitong Huwebes ng hapon ang pagkakakulong ng retiradong pulis na si Colonel Royina Garma matapos siyang ma-cite for contempt dahil sa pagsisinungaling at pag-iwas sa mga tanong ng mga mambabatas.
Sa ginanap na pagdinig ukol sa mga pagkamatay na may kinalaman sa drug war ng nakaraang administrasyon, inaprobahan ng komite ang mosyon na ikulong si Garma sa Batasan complex hangga’t hindi natatapos ang imbestigasyon o hanggang siya’y magpasyang makipagtulungan.
Si Garma ay itinuro ng apat na resource persons bilang siyang umano’y nagbigay ng utos mula kay dating Pangulong Rodrigo Duterte na ipapatay ang tatlong hinihinalang Chinese drug lords sa loob ng Davao Prison and Penal Farm (DPPF) noong 2016.
“Ako’y naniniwala na kung siya’y magpapasya na makipagtulungan, bukas naman ang komite na pagbigyan siya ng reconsideration,” ayon kay Surigao del Norte Representative Robert Ace Barbers, ang overall head ng quad committee.
Sa kaniyang pagtatanong, ipinahayag ni Abang Lingkod Representative Joseph Stephen Paduano ang pagkadismaya sa mga sagot ni Garma ukol sa kaniyang relasyon kay Duterte at ang mabilis na pagkatalaga sa kaniya bilang general manager ng Philippine Charity Sweepstakes Office (PCSO) matapos ang kaniyang pagretiro mula sa serbisyo noong 2019.
Hinikayat ni Paduano si Garma na sagutin nang direkta ang tanong ukol sa kanyang pagiging malapit kay Duterte matapos magbigay ng hindi tiyak na mga sagot ang dating opisyal.
“I will ask you, are you special and close to the President, former President? Yes or no na po? Walang personal? Yes or no na po?” tanong ni Paduano.
Sumagot si Garma, “Mr. Chair, I’m not close. Nag-floating pa nga ako during his time,” tumutukoy sa panahon nang wala siyang posisyon noong panahon ni Duterte bilang mayor ng Davao City.
Sa pagdinig, nabunyag na nagkaroon ng ilang posisyon si Garma sa Davao City Police, kabilang na ang pagiging station commander ng Sasa at Sta. Ana, at pagiging pinuno ng Women’s Desk ng Davao City Police. Siya rin ay naglingkod bilang police administration officer ng Davao City Police Station.
Sa huling bahagi ng pagdinig, inudyok ni Paduano na i-cite for contempt si Garma dahil sa umano’y sadyang pag-iwas nito sa mga tanong ng komite.
Si Garma ay pinatawag sa pagdinig upang linawin ang kaniyang papel sa pagpatay noong 2016 ng tatlong hinihinalang Chinese drug lords na sina Chu Kin Tung (alias Tony Lim), Li Lan Yan (alias Jackson Li), at Wong Meng Pin (alias Wang Ming Ping) sa loob ng DPPF.
Si Garma ay itinalaga bilang general manager ng PCSO noong Hulyo 15, 2019 matapos siyang magretiro mula sa Philippine National Police (PNP) noong Hunyo 2019, dala ang 24 na taon ng serbisyo.
Laging nakatutok sa Pwersa Balita para sa mga balita na dapat mong malaman! Kami ang Pwersa Balita! Bisitahin rin ang aming mga social media accounts:
- https://www.facebook.com/PwersaBalita/
- www.youtube.com/@pwersabalita
- https://x.com/PwersaBalita
- https://www.tiktok.com/@pwersabalita
- https://www.instagram.com/pwersabalita/
- https://www.threads.net/@pwersabalita
Kenneth Marcos