By Arvie Jane Dacara 
Matapos ang makasaysayang pagkapanalo sa 9th Asian Winter Games sa Harbin, China, maghahanap ng karagdagang pondo ang Philippine Olympic Committee (POC) upang masuportahan ang pambansang curling team ng Pilipinas.
Ito ang kauna-unahang gintong medalya ng Pilipinas at ng anumang bansa sa Timog-Silangang Asya sa naturang paligsahan na ginaganap kada apat na taon.
Ang koponan ay binubuo ng magkapatid na sina Enrico Gabriel at Marc Angelo Pfister, kasama sina Christian Patrick Haller, Allan Beat Frei, at Benjo Delarmente. Tinalo nila ang South Korea sa finals noong Pebrero 14 sa iskor na 5-3.
Ayon kay POC chairman Abraham Tolentino, malaking hamon ang gastusin ng koponan sa bawat kompetisyon kaya mahalagang makakuha ng sapat na pinansyal na suporta upang mapanatili ang kanilang paghahanda patungo sa Milano Cortina Winter Olympic Games.
Sa ilalim ng Republic Act 10699 o Expanded Sports Benefits and Incentives Act, tatanggap ng PHP2 milyon ang curling team bilang insentibo sa kanilang pagkapanalo.
Nagpasalamat naman si Christian Patrick Haller, isang dating manlalaro ng Swiss national team, sa suporta ng sambayanang Pilipino.
“Isang patunay ito na kahit mula tayo sa isang tropikal na bansa, kaya nating makipagsabayan sa ganitong larangan at magtagumpay,” ani Haller.
Para kay Marc Pfister, na ang asawang si Jessica Pfister ang naging coach ng team, ito ay isang pambihirang pagkakataon upang ipagmalaki ang Pilipinas sa pandaigdigang kompetisyon.
Sa kanilang paglalakbay patungo sa gintong medalya, pinataob ng Pilipinas ang world No. 10 Japan sa iskor na 10-4 sa qualification round, at No. 17 China sa iskor na 7-6 sa semifinals. Sa elimination round, nagtala ang koponan ng 4-1 win-loss record, kung saan ang nag-iisang talo nila ay laban sa South Korea sa kanilang unang laban, 1-6.
Laging nakatutok sa Pwersa Balita para sa mga balita na dapat mong malaman! Kami ang Pwersa Balita!
📢 Sundan ang aming social media accounts:
➡️ Facebook: Pwersa Balita
➡️ YouTube: Pwersa Balita
➡️ X (Twitter): Pwersa Balita
➡️ TikTok: Pwersa Balita
➡️ Instagram: Pwersa Balita
➡️ Threads: Pwersa Balita
Kenneth Marcos