By Arvie Jane Dacara 
Nangako si Pangulong Ferdinand R. Marcos Jr. na palalakasin ang bilateral na ugnayan sa pagitan ng Pilipinas at Cambodia. Ito ay matapos ang kanyang pagpupulong kay Cambodian Deputy Prime Minister Sok Chenda Sophea sa Malacañang Palace nitong Martes, kung saan binigyang-diin niya ang kahalagahan ng patuloy na kooperasyon sa Cambodia at iba pang miyembro ng Association of Southeast Asian Nations (ASEAN).
“Ako’y umaasa na maipagpapatuloy natin ito. Patitibayin natin ang relasyong ito at patuloy na pauunlarin ang matagal na nating ugnayan,” wika ni Marcos, ayon sa pahayag ng Presidential Communications Office (PCO) ngayong Miyerkules.
Binanggit ng Pangulo na masigasig ang Pilipinas sa pagsasagawa ng mga pakikipag-alyansa at kooperasyon sa iba pang kaalyadong bansa sa buong mundo.
Matatag ang ugnayan ng Pilipinas at Cambodia mula nang muling ipanumbalik ang kanilang diplomatikong relasyon noong 1995.
Si Deputy Prime Minister Sok ay nasa bansa upang pangunahan ang ika-4 na Pagpupulong ng Cambodia-Philippines Joint Commission for Bilateral Cooperation (JCBC) sa imbitasyon ni Foreign Affairs Secretary Enrique Manalo. Ang dalawang araw na pagpupulong ay layuning suriin ang progreso ng mga kasunduang napagkasunduan ng dalawang bansa noong ika-3 Pagpupulong ng Cambodia-Philippines JCBC noong Disyembre 2021.
Ito ang kauna-unahang bilateral na pagbisita ng opisyal ng Cambodia sa isang bansang miyembro ng ASEAN bilang pinuno ng delegasyon at bilang Cambodian Foreign Minister mula noong 2017.
Laging nakatutok sa Pwersa Balita para sa mga balita na dapat mong malaman! Kami ang Pwersa Balita! Bisitahin rin ang aming mga social media accounts: Facebook, YouTube, X, TikTok, Instagram, Threads.
Kenneth Marcos