By Arvie Jane Dacara 
Inatasan ni Pangulong Ferdinand R. Marcos Jr. ang Department of Information and Communications Technology (DICT) na unahin ang pagtatatag ng konektibidad sa mga liblib at malalayong lugar sa buong bansa.
Ang direktiba ay ginawa ni Marcos sa isinagawang sectoral meeting tungkol sa National Digital Connectivity Plan (NDCP) 2024-2028 sa Malacañang nitong Lunes, kung saan ipinakita ng DICT ang kanilang mga mungkahing connectivity projects.
“Ayusin muna natin ang konektibidad. Mas mahalaga ito kaysa sa ibang bagay,” ani Marcos, ayon sa Presidential Communications Office (PCO).
Iminungkahi ng Pangulo na ipatupad agad ang programa ng libreng WiFi sa mga lugar kung saan kaya ng gobyerno magbigay ng serbisyong konektado sa internet. Ayon sa kanya, makatutulong ang pamahalaan sa pamamagitan ng pagbibigay ng koneksyon sa mga pasilidad ng gobyerno gaya ng mga tanggapan ng barangay at lokal na pamahalaan (LGU).
“Ibibigay natin ang access sa mga pasilidad ng gobyerno, barangay offices, at LGUs para magkaroon ng merkado. Kapag nasanay na ang mga tao na may ganitong sistema, maaari nang ilagay sa budget ang allowance para sa WiFi dahil set up na ito,” paliwanag ng Pangulo.
Kapag naaprubahan ang budget, ang NDCP ang magiging pangunahing plano ng bansa para sa pagkakaroon ng malawakang digital connectivity at gagamitin bilang daan tungo sa digital na Pilipinas.
Kamakailan ay inaprubahan ni Marcos ang USD288 milyong Philippine Digital Infrastructure Project, na layong makumpleto ang pambansang fiber backbone at magdala ng mabilis na internet connection kahit sa mga liblib na lugar. Ito ay popondohan ng official development assistance mula sa World Bank at magsisilbing pangunahing proyekto ng DICT.
Noong Hulyo, iniulat ng DICT ang pagkakaroon ng 13,462 free WiFi sites sa 1,401 lungsod at bayan sa buong bansa, kabilang ang 3,040 Geographically Isolated and Disadvantaged Areas. Aabot na sa 9.8 milyong Pilipino ang nakinabang sa Free Public Internet program ng DICT.
Ang Republic Act 10929 o Free Internet Access Program in Public Places, na naisabatas noong 2017, ay nag-aatas sa mga pampublikong lugar gaya ng ospital, transport terminals, at mga opisina ng pamahalaan na magbigay ng libreng internet access.
Laging nakatutok sa Pwersa Balita para sa mga balita na dapat mong malaman! Kami ang Pwersa Balita! Bisitahin rin ang aming mga social media accounts:
- https://www.facebook.com/PwersaBalita/
- www.youtube.com/@pwersabalita
- https://x.com/PwersaBalita
- https://www.tiktok.com/@pwersabalita
- https://www.instagram.com/pwersabalita/
- https://www.threads.net/@pwersabalita
Kenneth Marcos