By Arvie Jane Dacara 
Isinusulong ang pagbuo ng bagong lalawigan ng Kutawato sa Bangsamoro Autonomous Region in Muslim Mindanao (BARMM) upang masiguro ang karapatan ng bawat mamamayan na makaboto, partikular na sa Special Geographic Area (SGA) ng rehiyon.
Sa pagdinig ng Senate Committee on Local Government nitong Miyerkules, binigyang-diin ni Senator Joseph Victor Ejercito ang kahalagahan ng pagbibigay ng karapatang bumoto sa mga mamamayan ng SGA sa darating na 2025 elections.
Sa kanyang pahayag, inalala ni Ejercito ang pagpasa ng Bangsamoro Organic Law noong ika-17 Kongreso na naglalayong maghatid ng pangmatagalang kapayapaan sa Mindanao. Sa ilalim ng batas, nagkaroon ng plebisito kung saan 63 barangay sa Cotabato ang naging bahagi ng BARMM at bumuo ng walong bagong bayan.
Ngunit sa kabila nito, naharap ang mga bagong bayan sa problema ng kawalan ng probinsyal na kaanib, na nagdulot ng hamon sa pamamahala at sa electoral process.
“Napag-usapan sa isang pagdinig kamakailan ang isyu ng disenfranchisement ng higit 60 barangay dahil sa hindi malinaw na probinsyal na kaanib,” ani Ejercito.
Buong suporta niya ang ipinahayag sa Senate Bill No. 2875 na inihain ni Senator Robinhood Padilla. Sa panukalang batas, bubuuin ang Kutawato Province mula sa 63 barangay ng Pahamuddin (kabisera), Kadayangan, Nabalawag, Old Kaabakan, Kapalawan, Malidegao, Tugunan, at Ligawasan.
Layon ng panukalang batas na bigyang pagkakataon ang mga residente ng 63 barangay na makilahok sa eleksyon at tiyaking may representasyon sa demokratikong proseso.
“Magiging instrumento ang batas na ito upang bigyang-karapatan ang ating mga kababayan sa SGA na bumoto,” ani Ejercito.
Higit pa rito, ang paglikha ng Kutawato Province ay magpapahusay sa pamamahala at paghahatid ng serbisyo. Magkakaroon ng mas episyenteng pagbibigay ng mga pangunahing serbisyo, pagpapabuti ng imprastruktura, at pagpapatibay ng operasyon ng lokal na pamahalaan.
Ayon kay Senator Padilla, mahalagang magtatag ng probinsya para sa SGA upang masiguro ang kaunlaran at maiwasan ang diskriminasyon. “Ang pagbuo ng probinsya ay kritikal upang masiguro ang inclusive development, mapatatag ang kapayapaan, at mapigilan ang disenfranchisement ng mga tao.”
Dagdag naman ni Senator Sherwin Gatchalian, mas kilala ng mga lokal na opisyal ang pangangailangan ng kanilang nasasakupan. “Alam nila ang mga problema at pangarap ng kanilang nasasakupan kaya’t nararapat silang pakinggan,” aniya.
Laging nakatutok sa Pwersa Balita para sa mga balita na dapat mong malaman! Kami ang Pwersa Balita! Bisitahin rin ang aming mga social media accounts:
Kenneth Marcos