By Arvie Jane Dacara 
Iuuwi sa Pilipinas ngayong araw si Alice Guo, ang na-dismiss na mayor ng Bamban, Tarlac, mula Indonesia sakay ng isang chartered plane, ayon kay Senador Raffy Tulfo ngayong Huwebes.
Sa mensahe ni Tulfo sa mga mamamahayag, sinabi niyang sasamahan ni Department of the Interior and Local Government (DILG) Secretary Benhur Abalos at Philippine National Police (PNP) Chief Gen. Rommel Marbil si Guo.
“Inaasahang darating sa Pilipinas mula Jakarta, Indonesia mamayang 6:18 PM si dismissed Bamban Mayor Alice Guo o Guo Hua Ping sakay ng chartered flight RP-C6188,” ayon kay Tulfo.
Dagdag pa niya, aalis ang grupo mula Indonesia bandang ala una ng hapon.
Inihayag din ni Tulfo na dinala ni Abalos ang warrant of arrest na inisyu ng Senado. Sa kasalukuyan, pinoproseso na si Guo ng Bureau of Immigration (BI) at National Bureau of Investigation (NBI) para sa kanyang pagbabalik sa bansa.
Matapos ang mga kinakailangang proseso, dadalhin si Guo sa Senado upang dumalo sa imbestigasyon ng kanyang umano’y kaugnayan sa Philippine Offshore Gaming Operations (POGO).
Si Tulfo, na pinuno ng Senate Committee on Public Services, ay kasalukuyang sinusuri ang mga operational procedures sa mga seaport at airport sa bansa. Naniniwala siyang ang chartered flights at mga backdoor exits ay ginagamit sa mga ilegal na aktibidad tulad ng smuggling at human trafficking.
Binigyang-diin ni Tulfo na mahalaga ang pagtutok sa mga kakulangan na ito upang mapabuti ang kahusayan, seguridad, at pagpapanatili ng kalakalan, turismo, at konektibidad ng bansa.
Laging nakatutok sa Pwersa Balita para sa mga balita na dapat mong malaman! Kami ang Pwersa Balita! Bisitahin rin ang aming mga social media accounts:
- https://www.facebook.com/PwersaBalita/
- www.youtube.com/@pwersabalita
- https://x.com/PwersaBalita
- https://www.tiktok.com/@pwersabalita
- https://www.instagram.com/pwersabalita/
- https://www.threads.net/@pwersabalita
Kenneth Marcos