By Arvie Jane Dacara 
Inaprubahan ni Pangulong Ferdinand R. Marcos Jr. ang mas mataas na year-end gratuity pay para sa mga Contract of Service (COS) at Job Order (JO) workers ng gobyerno para sa fiscal year 2024.
Ayon sa Administrative Order (AO) 28 na nilagdaan noong Huwebes at isinapubliko nitong Biyernes, makakatanggap ang mga kwalipikadong COS at JO workers ng gratuity pay na hanggang ₱7,000, mas mataas kumpara sa ₱5,000 noong 2023.
Ang mga manggagawang may kabuuang apat na buwan o higit pa ng “actual satisfactory service performance” hanggang Disyembre 15, 2024, at may aktibong kontrata sa parehong petsa, ay karapat-dapat sa buong halaga ng gratuity pay.
“Ang pagbibigay ng year-end gratuity pay ay nararapat na pagkilala sa kanilang pagsusumikap at mahalagang kontribusyon sa pagpapatupad ng mga programa, aktibidad, at proyekto ng gobyerno, lalo na sa gitna ng kasalukuyang hamon sa sosyo-ekonomiya,” ayon sa AO 28.
Saklaw ng AO 28
Ang kautusan ay sumasaklaw sa lahat ng COS at JO workers na direktang kinuha ng National Government Agencies (NGAs), State Universities and Colleges (SUCs), Government-Owned or -Controlled Corporations (GOCCs), at Local Water Districts (LWDs).
Ang mga manggagawang may mas mababa sa apat na buwan ng aktwal at kasiya-siyang serbisyo ay maaari ring makatanggap ng isang beses na gratuity pay sa pro rata na basehan:
- ₱6,000 para sa tatlong buwan ngunit mas mababa sa apat na buwan
- ₱5,000 para sa dalawang buwan ngunit mas mababa sa tatlong buwan
- ₱4,000 para sa mas mababa sa dalawang buwan
Pondo para sa Gratuity Pay
Ang pondo para sa gratuity pay ay kukunin mula sa Maintenance and Other Operating Expenses (MOOE) allotment ng mga NGA at SUC. Para sa mga GOCC at LWD, ito ay manggagaling sa kanilang Corporate Operating Budgets.
Hinihikayat din ang mga Local Government Units (LGUs) na magpatupad ng kahalintulad na gratuity pay sa kanilang COS at JO workers.
Ang mga kahilingan para sa paggamit ng savings ay kailangang isumite ng NGAs at SUCs sa Department of Budget and Management (DBM) sa loob ng limang araw ng pagkapabisa ng AO 28, para sa pag-endorso sa Office of the President.
Ang DBM naman ang maglalabas ng kaukulang Special Allotment Release Order at Notice of Cash Allocation sa pag-apruba ng Pangulo.
Laging nakatutok sa Pwersa Balita para sa mga balita na dapat mong malaman. Kami ang Pwersa Balita! Bisitahin rin ang aming mga social media accounts:
Kenneth Marcos