By Arvie Jane Dacara 
Nilagdaan ni Pangulong Ferdinand R. Marcos Jr. noong Miyerkules ang batas na magpapataw ng value-added tax (VAT) sa mga dayuhang digital service providers (DSPs). Ang Republic Act (RA) 12023, isa sa mga prayoridad na batas ng administrasyon, ay nagpapataw ng 12% VAT sa mga DSPs tulad ng Netflix, Disney, at HBO upang makalikom ng karagdagang kita para sa pamahalaan.
Sa kanyang mensahe, sinabi ni Marcos na ang bagong batas ay magbibigay ng patas na laban para sa mga lokal na tagapagbigay ng serbisyo.
“Kung kumikita ka mula sa digital economy dito, nararapat lamang na tumulong ka rin sa paglago nito. Kahit maliit na tech startup ka o isang global tech giant na nakabase sa ibang panig ng mundo, kung kumikita ka sa Pilipinas, bahagi ka ng ating komunidad at may kaakibat na responsibilidad,” ani Marcos.
Ayon sa pangulo, inaasahan na makakalikom ng humigit-kumulang PHP105 bilyon ang gobyerno sa susunod na limang taon mula sa RA 12023. Ang halagang ito ay sapat upang makapagpatayo ng 42,000 classrooms, higit sa 6,000 rural health units, at 7,000 km ng farm-to-market roads.
Bukod dito, 5% ng kita mula sa bagong batas ay ilalaan sa lokal na creative industry. “Ibig sabihin nito, ang ating mga artista, filmmakers, musikero, at iba pang talentong Pilipino na nagpupuno ng ating mga platform ng content ay direktang makikinabang. Tinitiyak nito na ang ating mga malikhaing talento ay hindi lamang makakaraos, kundi yayabong pa sa makatarungan at progresibong digital na merkado,” dagdag ni Marcos.
Nagpasalamat din ang pangulo sa mga mambabatas sa pagpasa ng naturang batas at hinikayat ang mga kumpanyang sakop nito na sundin ang mga alituntunin ng RA 12023.
Patas na Patakaran sa Buwis
Ayon naman kay Senador Sherwin Gatchalian, inaasahan ng bagong batas na matugunan ang mga pagkalugi sa kita ng pamahalaan sa pamamagitan ng paglilinaw sa pagbubuwis ng mga dayuhang digital service providers at pagtanggal sa kalituhan sa dating batas.
“Naniniwala kami sa kahalagahan ng paglikha ng patas na kapaligiran kung saan ang mga digital service providers, dayuhan man o lokal, ay sumasailalim sa patas at pantay na patakaran sa buwis,” pahayag ni Gatchalian.
Dagdag pa niya, hindi ito nangangahulugan ng pagpapataw ng bagong buwis.
“Hindi tayo nagpapataw ng bagong buwis. Kokolektahin lang natin ang buwis na dapat naman nating nakokolekta mula sa mga dayuhang digital service providers,” ani Gatchalian.
Laging nakatutok sa Pwersa Balita para sa mga balita na dapat mong malaman! Kami ang Pwersa Balita! Bisitahin rin ang aming mga social media accounts:
Kenneth Marcos