By Kenneth Marcos 
Matapos ang masusing pagsusuri, inalis na ng Department of Agriculture ang pansamantalang ban sa pag-angkat ng mga ibon at poultry products mula New Zealand.
Sa mga nagtitinda sa palengke at mga konsumer na matagal nang humaharap sa mahal na presyo ng manok at itlog, magandang balita ito. Ngayong Oktubre, opisyal nang pinayagan ng Department of Agriculture (DA) ang muling pagpasok sa bansa ng mga ibon, karne ng manok, itlog, at iba pang poultry products mula New Zealand.
Ayon sa kalihim ng DA na si Francisco “Kiko” Tiu Laurel Jr., ibinaba ang desisyong ito matapos matanggap ang ulat mula sa World Organisation for Animal Health (WOAH) na nagsasabing kontrolado na ang bird flu outbreak sa New Zealand.
Una nang nagpatupad ng ban ang DA noong Abril 2024 bilang pag-iingat laban sa H5N1 avian influenza, isang malubhang uri ng bird flu na nakakaapekto sa parehong mailap at alagang ibon. Sa loob ng anim na buwan, isinara ng Pilipinas ang borders nito sa poultry imports mula New Zealand upang mapanatili ang kalinisan at kaligtasan ng lokal na supply ng manok at itlog.
Pero matapos ang masusing monitoring at quarantine protocols ng gobyerno ng New Zealand, muling napatunayang ligtas na ang kanilang poultry products para sa pag-export. Bunsod nito, nilagdaan ni Secretary Laurel ang Memorandum Order No. 70 series of 2025 na nagbabasura sa import ban.
Nilinaw ng DA na mananatiling mahigpit ang mga biosecurity protocols sa lahat ng imported poultry products. Kailangan pa ring dumaan sa inspeksyon ang lahat ng produkto sa mga entry points ng bansa tulad ng pier at paliparan. Bukod dito, pinapayuhan pa rin ang mga negosyante at consumers na maging maingat at siguraduhing may kaukulang permits ang kanilang mga binibili.
Ang New Zealand ay isa sa mga maaasahang pinagkukunan ng Pilipinas ng high-quality poultry meat at eggs, lalo na sa panahon ng kakulangan sa local supply. Ayon sa Philippine Statistics Authority (PSA), tumaas ng 8.2% ang farmgate price ng manok sa ikalawang quarter ng 2025 kumpara sa parehong panahon noong nakaraang taon. Isa sa mga dahilan nito ang limitadong supply at mataas na production costs sa lokal na industriya.
Sa pagbabalik ng poultry imports mula New Zealand, umaasa ang DA na bababa ang presyo sa merkado at masisiguro ang sapat na supply ng poultry products lalo na ngayong papalapit ang kapaskuhan, kung kailan tumataas ang demand para sa manok at itlog.
“Ang ating layunin ay tiyaking may sapat, ligtas, at abot-kayang pagkain sa bawat hapag,” pahayag ni Secretary Laurel. Dagdag pa niya, patuloy ang DA sa pagsubaybay sa global animal health situation upang mabilis na makapagrekomenda ng tamang hakbang kung kinakailangan.
Para sa mga mamimili, ito ay isang paalala na habang patuloy nating binabantayan ang kalusugan ng bansa, mahalaga ring suportahan ang balanseng supply ng lokal at imported na pagkain.
Pwersa Balita – Your Trusted Source in Agri News