By Kenneth Marcos 
Maulap na umaga at malakas na hangin ang gumising sa mga taga-Cagayan ngayong Huwebes, habang patuloy ang paggalaw ng dalawang sama ng panahon sa loob at paligid ng bansa.
Patuloy ang paglalakbay ng Tropical Depression Mirasol papalabas ng Philippine Area of Responsibility (PAR), ayon sa DOST-PAGASA ngayong Huwebes, Setyembre 18. Samantala, nananatiling naka-monitor ang mga awtoridad sa isa pang sama ng panahon, si Nando, na inaasahang lalakas pa sa mga susunod na araw.
Ayon sa pinakahuling ulat ng PAGASA, si Mirasol ay huling namataan sa layong 165 kilometro kanluran ng Calayan, Cagayan, taglay ang lakas ng hanging hanggang 55 km/h at bugso ng hanggang 70 km/h. Inaasahang lalabas ito ng PAR ngayong umaga o hapon habang patuloy ang paggalaw nito pa-kanluran hilagang-kanluran sa bilis na 10 km/h.
Maaaring lumakas si Mirasol at maging isang tropical storm bago ito tuluyang makalabas ng bansa. Bagama’t paalis na, magdudulot pa rin ito ng mga pag-ulan at hangin sa ilang bahagi ng hilagang Luzon.
Kasabay nito, si Nando ay patuloy na lumalakas habang nasa silangan ng bansa at inaasahang magiging isang ganap na bagyo o typhoon pagsapit ng Sabado, Setyembre 20. Sa kasalukuyan, hindi pa ito direktang nakakaapekto sa kalupaan, ngunit pinaiigting nito ang southwest monsoon o habagat.
Dahil sa epekto ng habagat, makararanas ng katamtaman hanggang sa malakas na pag-ulan ang mga bahagi ng Southern Luzon at kanlurang Visayas. Pinag-iingat ang mga residente sa mga lugar na madaling bahain o may history ng landslide.
Ayon sa Department of Agriculture – Disaster Risk Reduction and Management (DA-DRRM) Operations Center, may mababang hanggang bahagyang banta sa buhay at ari-arian dulot ng malalakas na hangin. Gayunpaman, hinimok pa rin ang publiko na manatiling alerto, lalo na ang mga magsasaka at mangingisda na maaaring maapektuhan ang kabuhayan.
Ang ganitong panahon ay paalala ng patuloy na panganib ng kalikasan, lalo na sa mga komunidad na pinaka-vulnerable sa pagbabago ng klima. Muling pinapaalalahanan ng PAGASA ang publiko na sundan ang mga opisyal na update mula sa kanilang website at verified social media pages para sa pinakabagong impormasyon.
Pwersa Balita – Your Trusted Source in Agri News