By admin 
Maynila, Pilipinas – Matagumpay na nagsagawa ng isang malawakang motorcade sa kahabaan ng Taft at Rizal Avenues ang A TEACHER Party-list sa pangunguna ng kanilang mga nominado na sina Julieta Cortuna, Edgardo Avengonzar Jr., at Virginia Rodriguez. Ang nasabing motorcade ay nagtapos sa isang makasaysayang meeting de avance sa Plaza Miranda.
“Ito ay isang makasaysayang araw para sa A TEACHER Party-list dahil ngayon ang kauna-unahang pagkakataon na ginanap natin ang meeting de avance sa Plaza Miranda. Isang matagumpay at makabuluhang araw ito para sa ating lahat,” pahayag ni Julieta Regudo Cortuna habang nagpapasalamat sa mga sumuporta sa kaganapan.
Ang Advocacy for Teacher Empowerment Through Action, Cooperation, and Harmony Towards Educational Reforms, Inc., o mas kilala bilang A TEACHER Party-list, ay isang grupo na nagsusulong ng mga karapatan at kapakanan ng mga guro sa buong bansa.
Sa isang panayam ng Pwersa Balita, binigyang-diin ng pangalawang nominado ng A TEACHER Party-list na si Edgardo Avengonzar Jr. ang mahalagang papel ng mga guro sa paghubog ng ating bansa. “Ang isang guro ay hindi lang nagtuturo ng akademikong kaalaman kundi may malaking papel din sa paghubog ng personalidad at panlipunang pag-unlad ng mga mag-aaral. Bukod sa tradisyunal na pagtuturo, ang mga guro ay nagsisilbing gabay sa mga hamon sa buhay ng kanilang mga estudyante, tumutulong sa tamang pagpapasya, at nagbibigay ng emosyonal na suporta upang mapatatag ang kanilang loob. Sila rin ay huwaran ng mabuting asal at tamang pagpapahalaga.”
Natapos ang kaganapan sa Plaza Miranda sa Quiapo, Maynila, kung saan nagtipon ang maraming tagasuporta upang ipaglaban ang mga karapatan ng mga guro at mga reporma sa edukasyon. Ang napakalaking bilang ng dumalo ay patunay ng lumalakas na suporta ng publiko sa misyon ng A TEACHER Party-list na palakasin ang sektor ng edukasyon sa Pilipinas.
(Mga larawan ni Jesse Bustos/The Philippine STAR)
Kenneth Marcos