By Arvie Jane Dacara 
Ayon kay Philippine Economic Zone Authority (PEZA) Director General Tereso Panga, ang pagpapalawak ng West Cebu Estate (WCE) sa Balamban, Cebu ay inaasahang makakaakit ng P35 bilyong halaga ng pamumuhunan.
Sa isang post sa social media, ibinahagi ni Panga na ang AboitizInfra Capital (AIC) ang nangunguna sa proyektong ito, na magdaragdag ng karagdagang 39 ektarya sa kasalukuyang 280 ektaryang PEZA-proclaimed ecozone.
“Ang mga inisyatiba at pagpapalawak ng AIC ay patunay ng potensyal ng PEZA ecozone model, lalo na kapag may pakikipagtulungan sa mga malalaking pribadong sektor. Sama-sama, mas marami tayong maaabot para sa paglikha ng trabaho, pagpapalakas ng industriya, at pag-unlad ng kanayunan —ang mga pangunahing layunin ng PEZA,” sabi ni Panga.
Ayon sa PEZA, naglaan ang AIC ng P1.4 bilyon para sa pagpapalawak, habang ang natitirang P35 bilyon ay inaasahang manggagaling sa apat na locators.
Dagdag pa ni Panga, ang paunang pamumuhunan ay lilikha ng 14,000 bagong trabaho, na doble ng kasalukuyang 13,935 trabaho na nalilikha ng 23 locators sa WCE. Sa kasalukuyan, ang mga kumpanyang nasa WCE ay nag-aambag ng humigit-kumulang USD47.5 milyong export revenues kada buwan.
“We in PEZA, kasama ang aming growth champion —ang ecozone developers— ay patuloy na nagtatayo ng mga tahanan para sa mga dayuhang kumpanya na nais magtagal sa Pilipinas,” aniya. Dagdag pa niya, ang mga makabagong ecozone na ito ay magiging susi sa pagpapalakas ng papel ng Pilipinas bilang global manufacturing hub, na magpapataas din ng kalidad ng buhay ng mga komunidad na nakapaligid dito.
Laging nakatutok sa Pwersa Balita para sa mga balita na dapat mong malaman! Kami ang Pwersa Balita! Bisitahin rin ang aming mga social media accounts:
- https://www.facebook.com/PwersaBalita/
- www.youtube.com/@pwersabalita
- https://x.com/PwersaBalita
- https://www.tiktok.com/@pwersabalita
- https://www.instagram.com/pwersabalita/
- https://www.threads.net/@pwersabalita
Kenneth Marcos