By Arvie Jane Dacara 
Apat ang nasawi habang 13 ang sugatan, kabilang ang isang 85-anyos na babae at isang 2-taong gulang na bata, matapos magsalpukan ang isang pribadong commuter van at isang pick-up truck sa national highway ng General Santos City nitong Linggo ng hapon.
Ayon kay Capt. Lamberto Rabino, hepe ng General Santos City Traffic Enforcement Unit, nangyari ang aksidente bandang alas-3 ng hapon malapit sa Barangay Apopong roundabout.
Nasawi sa insidente ang driver ng van na si Rasol Angkob Adam, 56, at tatlong senior citizen na pasahero mula sa Datu Odin Sinsuat, Maguindanao del Norte. Idineklarang dead on arrival ang mga biktima sa isang lokal na ospital.
Samantala, walong iba pang senior citizen na sakay ng van ang nagtamo ng iba’t ibang pinsala.
Sa pick-up truck naman, kabilang sa mga nasugatan ang driver na si Harvey Collado, 36, ang kanyang asawa, at kanilang tatlong anak na may edad 13, 9, at 2 taon. Ang pamilya Collado ay residente ng Tampakan, South Cotabato.
“Lumipat ng linya ang pick-up truck habang nag-overtake sa isa pang sasakyan, dahilan upang bumangga ito nang harapan sa paparating na van,” ayon kay Rabino.
Dahil sa matinding banggaan, parehong na-wasak ang harapang bahagi ng dalawang sasakyan, kabilang ang kanilang hood, bumper, at makina.
Patuloy na ginagamot ang mga sugatan sa iba’t ibang ospital sa General Santos City. Sa ngayon, nagsasagawa ng masusing imbestigasyon ang mga awtoridad upang malaman ang buong detalye ng insidente at maiwasan ang ganitong trahedya sa hinaharap.
Laging nakatutok sa Pwersa Balita para sa mga balita na dapat mong malaman—kami ang Pwersa Balita!
Bisitahin rin aming mga social media accounts:
🔵 Facebook
🔴 YouTube
🟡 X (Twitter)
🟢 TikTok
🟠 Instagram
⚫ Threads
Kenneth Marcos