By Arvie Jane Dacara 
Isinusulong ng Regional Development Council (RDC) ng Eastern Visayas ang agarang pagpapalabas ng ₱500 milyong calamity fund upang maisagawa ang pagkukumpuni ng San Juanico Bridge, ang mahalagang tulay na nag-uugnay sa tatlong pangunahing isla ng Pilipinas—Luzon, Visayas, at Mindanao.
Sa isang pagpupulong nitong Lunes, inaprubahan ng konseho ang isang resolusyon para pabilisin ang paglalabas ng pondo mula sa Disaster Risk Reduction and Management (DRRM) Fund. Ayon kay RDC Vice Chair at Regional Director ng Department of Economy, Planning, and Development na si Meylene Rosales, ang kasalukuyang limitadong access sa tulay ay itinuturing na isang uri ng kalamidad, kaya’t may batayan ang kanilang kahilingan.
“Maari tayong humiling ng DRRM fund dahil itinuturing na disaster ang limitadong paggamit sa San Juanico Bridge,” ani Rosales.
Ang ₱500 milyong pondo ay nakalaan para sa pagkukumpuni ng ilang bahagi ng pundasyon ng tulay ngayong taon, subalit aminado si Rosales na hindi ito sapat upang maibalik ang buong load capacity ng tulay na 53 taon nang ginagamit.
Ayon sa Department of Public Works and Highways (DPWH), tinatayang aabot sa ₱5.68 bilyon ang kailangang pondo upang ganap na maisaayos ang San Juanico Bridge. Isinusulong na maisama ang nasabing halaga sa 2026 at 2027 General Appropriations Act.
Kasama rin sa resolusyon ng RDC ang panawagan sa Kongreso na bigyan ng emergency powers si Pangulong Ferdinand R. Marcos Jr. upang magamit ang national calamity fund para sa tulay.
Bukod dito, inendorso rin ng RDC ang kahilingan ng Regional Disaster Risk Reduction and Management Council (RDRRMC) para sa karagdagang ₱195 milyong pondo bilang suporta sa agarang tugon ng pamahalaan sa krisis.
“Ang pondong ito ay pangunahing gagamitin para sa operations center at iba pang agarang serbisyo sa mga apektado,” dagdag pa ni Rosales.
Simula Mayo 15, mahigpit na ipinatupad ng DPWH ang tatlong toneladang load limit sa tulay, base sa rekomendasyon ng mga eksperto matapos ang malalim na pagsusuri ng kalagayan ng tulay.
Ang San Juanico Bridge, na may habang 2.16 kilometro, ang pinakamahabang tulay sa Pan-Philippine Highway at mahalagang tulay na nag-uugnay sa mga isla ng Luzon at Mindanao. Naitayo ito mula 1969 hanggang 1973 at itinuturing na simbolo ng koneksyon ng bansa.
Laging nakatutok sa Pwersa Balita para sa mga balita na dapat mong malaman — kami ang Pwersa Balita!
Bisitahin rin ang aming mga social media accounts:
https://www.facebook.com/PwersaBalita/
www.youtube.com/@pwersabalita
https://x.com/PwersaBalita
https://www.tiktok.com/@pwersabalita
https://www.instagram.com/pwersabalita/
https://www.threads.net/@pwersabalita
Kenneth Marcos