By Arvie Jane Dacara 
Nakipagpulong si Justice Secretary Jesus Crispin Remulla kay Pangulong José Ramos-Horta ng Timor-Leste at iba pang mga opisyal upang magbigay ng babala tungkol sa posibleng pagpasok ng Philippine Offshore Gaming Operators (POGO) sa kanilang bansa, gayundin ang usapin ng extradition ng dating mambabatas na si Arnolfo Teves Jr.
Pinangunahan ni Remulla ang delegasyon ng Pilipinas sa isang opisyal na pagbisita noong Martes upang maghatid ng mensahe mula kay Pangulong Ferdinand R. Marcos Jr. sa gobyerno ng Timor-Leste, na tumutok sa dalawang mahalagang agenda, ayon sa Department of Justice (DOJ) sa isang pahayag noong Miyerkules.
Opisyal na ipinaalam ni Remulla sa mga opisyal ng Timor-Leste na ipinagbawal na ni Pangulong Marcos ang operasyon ng POGOs sa Pilipinas, at ibinahagi rin ang mga ulat na posibleng lumipat ang operasyon ng mga ito sa Timor-Leste.
Tinalakay rin ni Remulla ang mga naging problema ng bansa sa ilalim ng POGO operations—kabilang ang mga isyu sa krimen, pag-iwas sa regulasyon, at banta sa seguridad ng publiko—na nagbunsod sa desisyon ng gobyerno na ipasara ang mga ito sa Pilipinas.
“Dahil sa parehong pamana at katolikong pagpapahalaga ng Pilipinas at Timor-Leste, mahalaga sa gobyerno ng Pilipinas na ipaalam sa Timor-Leste ang mga posibleng hamon sa ekonomiya at seguridad na dala ng pagpapahintulot sa mga POGO,” pahayag ng DOJ.
Pinag-usapan din ng delegasyon ng Pilipinas ang extradition case ng dating mambabatas na si Arnolfo Teves Jr., na kasalukuyang lumalaban sa pagpapauwi sa kanya sa Pilipinas upang harapin ang mga kasong multiple murder.
Umaasa si Remulla na patuloy na makikipagtulungan ang gobyerno ng Timor-Leste upang maibalik si Teves sa Pilipinas at harapin ang katarungan.
Ayon sa DOJ, binigyang-diin ni Remulla ang pangako ng gobyerno ng Pilipinas sa due process at ipinaabot ang pasensya sa paghihintay ng legal na resolusyon ng kaso sa Timor-Leste.
“Ang kasong ito ay patungkol sa paghahatid ng hustisya sa ilalim ng batas at pagtitiyak na ang mga may sala sa mga karumal-dumal na krimen ay mapapanagot. Patuloy naming iginagalang ang soberanya at legal na proseso ng Timor-Leste, ngunit nananatili kaming determinado sa paghahanap ng hustisya para sa mga biktima sa Pilipinas,” ani ni Remulla.
Laging nakatutok sa Pwersa Balita para sa mga balita na dapat mong malaman! Kami ang Pwersa Balita! Bisitahin rin ang aming mga social media accounts:
Kenneth Marcos