By Arvie Jane Dacara 
Ipinahayag ni Pangulong Ferdinand R. Marcos Jr. ang kanyang optimismo sa patuloy na pakikipagtulungan ng pamahalaan ng Pilipinas sa Marubeni Corporation, isa sa mga nangungunang kompanya sa kalakalan at pamumuhunan ng Japan, upang mapanatili ang pag-unlad ng ekonomiya ng bansa.
Sa pulong nila ng pangulo at chief executive officer ng Marubeni, Masumi Kakinoki, sa Palasyo ng Malacañang, kinilala ni Marcos ang mahigit isang siglo nang presensya ng kompanya sa Pilipinas at ang mahalagang papel nito sa mga programa ng pamahalaan.
“Sana’y marami pa tayong magawa dahil napakahalaga ng inyong kontribusyon sa aming mga programa sa pag-unlad. Malugod namin kayong tinatanggap muli,” pahayag ni Marcos kay Kakinoki, batay sa ulat ng Presidential News Desk nitong Martes ng gabi.
Ayon kay Kakinoki, isang pribilehiyo ang makapagtrabaho sa Pilipinas, kung saan maraming pagkakataon ang maaaring samantalahin ng Marubeni.
“Maraming salamat. Gusto kong ipahayag ang aking taos-pusong pasasalamat sa Pilipinas. Malaking oportunidad ang makaharap muli kayo… Lubos akong nasasabik na narito ngayon,” sabi ni Kakinoki kay Marcos.
Sa isang Facebook post, pinasalamatan ni Marcos ang Marubeni sa patuloy nitong tiwala sa Pilipinas.
“Ang kanilang malalaking pamumuhunan sa enerhiya, tubig, imprastruktura, at paggawa ay nagpapabuti ng mga serbisyo para sa milyun-milyong Pilipino at lumikha ng trabaho sa buong bansa. Sa buong suporta ng aking administrasyon, ang mga pakikipagtulungan ay magdadala ng tunay na progreso patungo sa ating Bagong Pilipinas,” ani Marcos.
Noong Pebrero ngayong taon, sa pulong nila ni Kakinoki sa Tokyo, muling pinagtibay ng Marubeni ang pakikipagtulungan sa Pilipinas, lalo na sa larangan ng renewable energy, tubig, at transportasyon.
Nagbunga rin ng isang kasunduan ang opisyal na pagbisita ni Marcos sa Tokyo noong Pebrero para sa mga proyektong pang-enerhiya, transportasyon, pangkalusugan, at pagtatanim ng mga puno.
Ang Marubeni Corporation, na itinatag noong Mayo 1858, ay isa sa mga nangungunang kompanya ng Japan na may operasyon sa iba’t ibang sektor tulad ng kalakalan, pamumuhunan, at mga malalaking proyektong pang-imprastruktura sa mahigit 60 bansa.
Sa kasalukuyan, ang Marubeni Philippines Corporation ay nananatiling isa sa mga pinakamatanda at pinakamahalagang bahagi ng network ng Marubeni sa buong mundo.
Laging nakatutok sa Pwersa Balita para sa mga balita na dapat mong malaman. Kami ang Pwersa Balita! Bisitahin rin ang aming mga social media accounts:
Kenneth Marcos