By Arvie Jane Dacara 
Tiniyak ng National Food Authority (NFA) nitong Miyerkules na nasa mabuting kalagayan ang national rice buffer stock ng bansa, kasabay ng mas mataas na presyo ng pagbili ng palay upang protektahan ang kapakanan ng mga lokal na magsasaka.
Sa isang ambush interview, sinabi ni NFA Administrator Larry Lacson na maaaring tumagal ang rice buffer stock ng hanggang 4.7 o halos limang araw. “As of September 18, 2024, ang stocks natin nationwide ay katumbas ng 3.1 milyong sako ng bigas o humigit-kumulang 157,000 metric tons,” ani Lacson.
Dagdag pa niya, nananatiling mataas ang presyo ng pagbili ng NFA ng palay kumpara sa mga alok ng ilang traders. “Sa Region III, may mga traders na nag-aalok ng PHP16 hanggang PHP17 kada kilo, pero ang presyo namin sa NFA ay nasa PHP21 hanggang PHP23 para sa fresh palay,” pahayag ni Lacson.
Para sa malinis at tuyong palay, nauna nang itinakda ng NFA ang presyo ng PHP23/kg hanggang PHP30/kg. Sinabi ni Lacson na ang estratehiya ng NFA sa pagpepresyo ay tumutulong sa mga magsasaka upang hindi sila samantalahin ng mga traders. “Dahil maganda ang presyo namin, napipilitang itaas ng mga traders ang kanilang alok upang makabili ng palay dahil negosyo nila iyon,” dagdag niya.
Gayunpaman, binanggit niya na posible pa rin ang pagbabago ng presyo depende sa galaw ng “market forces.” Patuloy naman ang pagtutok ng NFA sa kapakanan ng mga magsasaka, lalo na sa panahon ng anihan. “Posibleng bumaba ang presyo, pero hindi ibababa ng NFA ito sa lebel na makakasakit sa mga magsasaka,” pagtitiyak ni Lacson.
Inihayag din ni Lacson na nakikipagtulungan ang NFA sa Department of Agriculture (DA) at National Irrigation Administration (NIA) upang magamit ang kanilang mga truck para sa direktang pagbili ng palay mula sa mga sakahan. Sa usapin ng drying at milling facilities, may koordinasyon din ang NFA sa mga local government units sa buong bansa.
Laging nakatutok sa Pwersa Balita para sa mga balita na dapat mong malaman kami ang Pwersa Balita! Bisitahin rin aming mga social media accounts:
Kenneth Marcos